Дар мавзеи Кӯли ҷавонони Душанбе (собиқ Комсомол) то 9 сентябр боғи таъмиру навсозишуда мавриди истифода қарор мегирад. Дар боғ дигар аттраксионҳо насб намешаванд.
Тавре ба «Азия-Плюс» як манбаъ аз мақомоти шаҳрдории Душанбе дар ин робита хабар дод, дар боғи нав кӯчабоғу гулгаштҳо, нимкат (харак)-ҳо барои нишаст, қаҳвахона ва фаввораҳо бунёд шудааст. Воридшавӣ ба боғи нав бепул мешавад.
Таъмир ва пурра навсозии Боғи ҷавонон таҳти назорати сарвазири Тоҷикистон Қоҳир Расулзода қарор дорад.
Моҳи декабри соли гузашта тамоми аттраксион, дӯкону фурӯшгоҳ ва дигар иншооти дохил ва назди мавзеи боғ кӯчонида шуда, корҳои таъмиру навсозӣ оғоз гардиданд.
Қобили зикр аст, ки Кӯли ҷавонон сунъӣ буда, солҳои 1937-1939 сохта шудааст. Дарозии кӯл – 700 метр, бараш – на беш аз 300 метр ва ғунҷоишаш – 0,5 млн. метри мукааб об аст. Ҳудуди тамоми қаламрави боғ 29 гектар ва обанбор – 18,7 гектарро ташкил медиҳад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
