Фаъолияти терминали нақлиёти мусофирбари “Роҳи сафед”, ки дар маҳаллаи 7 километри роҳи мошингарди Душанбе – Ваҳдат (мавзеи комбинати полиграфӣ) ҷойгир аст, қатъ карда мешавад.
Бино ба иттилои дафтари матбуоти мақомоти шаҳрдории Душанбе, минбаъд ҳаракати воситаҳои нақлиёти мусофирбар – таксиҳо ба шаҳру ноҳияҳои самти минтақаи Кӯлоб ва ноҳияҳои водии Рашт (Файзобод, Роғун, Нуробод, Рашт, Сангвор, Тоҷикобод ва Лахш) аз Терминали шарқӣ (маҳаллаи Обшорон) ба роҳ монда мешавад.
Ба самти “Терминали шарқӣ автобусҳои №2, 7, 43 ва ҳамчунин микроавтобусҳо (маршруткаҳо)-и №5А, 15, 18 ва 39 равуо мекунанд.
Аз дастгоҳи раиси пойтахт ба “Азия-Плюс” дар ин робита иттилоъ доданд, ки сабаби қатъи фаъолияти таваққуфгоҳи “Роҳи сафед” дар он аст, ки дар он ҷо барои мусофирон ва ронандагон шароит зарурӣ муҳайё набуд ва ҳамчунин дар мавзеи ин терминал ба ҳаракати воситаҳои нақлиёти ҷамъиятӣ монеъа эҷод мешуд.
Сохтмони «Терминали шарқӣ» дар даромадгоҳи қисмати шарқии шаҳри Душанбе нимаи дуюми соли 2015 оғоз гардида, он майдони беш аз 1,4 гектарро ишғол мекунад. Таваққуфгоҳ бо ғунҷоиши то 300 адад воситаи нақлиёти гуногунҳаҷм аз бинои маъмурӣ, нуқтаи шустушӯ ва таъмири воситаҳои нақлиёт иборат мебошад.
Бинои асосии терминал аз се ошёна иборат буда, дар ошёнаи аввал толори интизорӣ бо ғунҷоиши то 90 нафар дар як вақт, ошхона барои 60 нафар, нуқтаи муоинаи тиббӣ, хонаи модару кӯдак ва дигар утоқҳои корӣ ҷойгиранд. Дар ошёнаҳои дуюму сеюми бинои асосии терминал 15 ҳуҷраи хоби яккаса ва оилавӣ барои 35 нафар бо шароити олӣ ва миёна мавҷуданд.
“Фаъолияти терминали нав шабонарӯзӣ роҳандозӣ гардида, дар он барои мусофирон ва ронандагон шароитҳои лозима муҳайё карда шудааст”, – хабар медиҳад мақомоти шаҳрдории пойтахт.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
