Давоми даҳ моҳи соли равон ба Тоҷикистон ба маблағи умумии наздики 39 млн. доллар кумаки башардӯстона ворид гардид.
Бино ба маълумоти Агентии омори назди президенти Тоҷикистон, имсол 57 кишвари дунё ба Тоҷикистон кумаки башардӯстона расонидаанд, ки вазни умумиаш беш аз 20 ҳазор тоннаро ташкил медиҳад.
Кишварҳои асосии мададрасони Тоҷикистон моҳҳои январ-октябри имсол Ҳиндустон (16,2% аз ҳаҷми умумии кумак) ва Русия (15,6%) дониста мешаванд. Ба ин ду кишвар қариб ҳудуди сеяки кумаки башардӯстона аз ҳаҷми умумӣ рост меояд.
Панҷяки кумак ба Швейтсария ва Чин рост меояд, ки ҳиссаи онҳо дар ҳаҷми умумӣ мутаносибан ба 11,2% ва 11,1% баробар аст.
Қобили зикр аст, ки нисбат ба ҳамин давраи соли гузашта ҳаҷми кумаки имсолаи башардӯстона ба Тоҷикистон қариб ду баробар кам шудааст: тӯли моҳҳои январ-октябри соли 2017 ҷумҳурӣ ба маблағи умумии беш аз 65,1 млн. доллар кумаки башардӯстона гирифта буд.
Дар ҳамин ҳол, соли гузашта шумори кишварҳои мададрасон камтар – 51 давлат буд. Соли пешин зиёда аз нисфи кумаки башардӯстона ба Тоҷикистон ба Чин (33,6%) ва Русия (19,2%) рост омада буд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
