Ҷасадҳои Раҷабмо Исоеваи 24-сола ва се фарзанди хурдсоли ӯ – Аҳмад, Фотима ва Муҳаммад рӯзи якшанбе, 6 январ ба Душанбе оварда шуд, хабар дод ба “Азия-Плюс” як манбаъ аз Фурудгоҳи байнулмилалии Душанбе. Ҷасадҳо нахуст аз Магнитогорск ба Екатеринбург ва сипас ба Душанбе интиқол дода шуданд.
Интиқоли ҷасадҳо аз Душанбе ба вилояти Хатлонро Вазорати меҳнат, муҳоҷират ва шуғли аҳолии ҷумҳурӣ ба уҳда гирифт.
Маросими намози ҷанозаи фавтидагон имрӯз, 7 январ соати 10 дар зодгоҳи онҳо – деҳаи Малик Гиёеви ҷамотати Ориёни ноҳияи Кӯшониён баргузор мешавад.
Ёдрас мекунем, ки падари ин хонавода – сокини 26-солаи ноҳияи Кӯшониён Шуҳрат Улфатовро аз аввалинҳо шуда, дар зери харобаҳои бино дарёфтанд.
Бино ба маълумоти охир, аз оғози амалиёти ҷустуҷӯ ва наҷотбахшӣ 45 нафар аз зери харобаҳо берун гирифта шудаанд, ки 39 нафарашон, аз ҷумла 6 нафар кӯдакон ҳалок ва 6 нафари дигар, аз ҷумла ду нафар кӯдакон наҷот дода шудаанд.
Субҳи рӯзи 31 декабр яке аз даромадгоҳҳои бинои баландошёна дар Магнитогорск фурӯ рехт. Фарзияи пешакии рух додани ҳодиса таркиши газ унвон мешавад. Бар асари он 48 манзил осеб дид.
Хабарҳои моро дар Viber пайгирӣ намоед, ба шабакаи мо бо суроғаи https://viber.com/asia-plus ҳамроҳ шавед.
Хабаргузории Asia-Plus-ро манбаи асосии иттилооти худ дар Google Новости бигардон, ба шабака бо суроғаи зерин обуна шав.
