Оҳангсози ҷавони тоҷик Соҳибҷон Ҳасанов дар Озмуни V байналмилалии «Зебоӣ ва ҳамоҳангӣ дар эҷод», ки дар шаҳри Сочии Федератсияи Россия ҷараён дорад, сазовори ҷойи аввал гардид.
Бино ба иттилои АМИТ «Ховар» бо истинод ба раиси Иттифоқи оҳангсозони (композиторони) Тоҷикистон Хуршед Низомов, озмуни мазкур бо ибтикори Вазорати фарҳанги кишвари Краснодари Федератсияи Россия баргузор гардида истодааст.
Гуфта мешавад, ҳадаф аз баргузории Фестивал — Озмун мустаҳкам намудани робитаҳои фарҳангӣ байни давлатҳо, ташаккули истеъдодҳо, рушди соҳаи фарҳанг, навоварӣ, инчунин омӯзиши самтҳои нави малакаи бадеӣ-эҷодии композиторони ҷавон ва навозандагону гурӯҳҳои эҷодӣ-касбӣ мебошад.
Озмун аз рўи номинатсияҳои санъати овозхонӣ, санъати иҷрокунандагӣ, санъати рақс, санъати рассомӣ, санъати эстрадаю сирк ва Озмуни «Композитори ҷавон» доир гардида, дар бахши Озмуни «Композитори ҷавон» намояндаи Тоҷикистон Соҳибҷон Ҳасанов ғолиби ҷойи аввал гардид.
Ёдрас мешавад, ки Соҳибҷон Ҳасанов хатмкунандаи Мактаб-интернати миёнаи махсуси санъати ҷумҳуриявии ба номи Миратулло Атоев буда, айни ҳол тибқи бурсияи таълимии Вазорати фарҳанги Тоҷикистон дар бахши сеюми факултаи композитории Донишкадаи давлатии фарҳанги шаҳри Краснодар таҳсил менамояд.
Зикр мегардад, ки номбурда шогирди яке аз композиторони маъруф, Раиси Иттифоқи композиторони кишвари Краснодар, Арбоби ҳунари Россия профессор Чернявский Владимир Андреевич мебошад.
Бо мо дар Telegram, Facebook, Instagram, Viber, Яндекс.Дзен, OK ва Google Новости бимонед.
