Ширкати миллии ҳавопаймоии “Тоҷик Эйр” кормандони худро ба рухсатии бемузд фиристод.
“Қарори ба рухсатии бемузд фиристодани кормандон бо мақсади ҳарҷӣ бештар кам шудани хароҷот дар ин “давраи барои ширкат мушкил” қабул шуд”, – изҳор намуд ба “Азия-Плюс” котиби матбуотии ширкат Азиз Хайруллоев.
Бино ба гуфтаи ӯ, “ояндаи наздик мо дар фаъолияти ширкат тағйироти куллӣ ва минбаъд беҳбуди вазъу бозгашти ҳайати шахсӣ ба ҷойҳои кориро интизорем”.
Хайруллоев мегӯяд, танҳо он кормандоне ба рухсатии бемузд фиристода шудаанд, ки дар робита ба боздошти парвоз дар хатсайрҳо бекор мондаанд.
“Роҳбаладон (стюардесса) ва халабонҳо ва кормандони дигар шуъбаҳо, ки муваққатан бекор монданд, ба рухсатӣ фиристода шуда, дафтари асосии кории ширкат бо реҷаи муқаррарӣ фаъолият дорад”, – хабар дод ӯ.
Зимнан хотиррасон шуд, ки парвоз бо хатсайрҳои ширкатро ба самти Русия “Сомон Эйр” анҷом дода, парвозҳо тариқи дигар хатсайрҳо муваққатан мутаваққиф шудаанд.
“Ният дорем, ки рӯзи 15 январ парвозро тариқи хатсайри Душанбе – Деҳлӣ ба иҷро расонем, дигар парвозҳо ба кишварҳои хориҷӣ боздошта шуда, парвоз бо хатсайри Душанбе –Хуҷанд низ муваққатан иҷро намешавад”, – гуфт Хайруллоев.
Ҳамчунин зикр шуд, ки қарзи ширкат назди кормандон аз музди меҳнат начандон зиёд буда, ҳамаи овозаҳо дар бораи ба кормандон муддати чанд моҳ пардохт нашудани маошашон асоси воқеӣ надорад.
“Дар ин давраи мушкили молиявӣ шояд ба чанде кормандон мо маош пардохт карда натавониста бошем, лекин ширкат бо ҳама ҳатман ҳисобаробарӣ хоҳад кард”, – изҳор намуд сухангӯи ширкат.
Аз ширкат ҳамчунин хабар доданд, ки таҳти роҳбарии сарвазири ҷумҳурӣ Қоҳир Расулзода комиссияи махсус таъсис ёфтааст, ки вазъро омӯхта, фаъолияти молиявии ширкатро месанҷад ва дар бораи тақдири минбаъдаи он қарор қабул хоҳад кард.
“Умедворем, ки ояндаи наздик вазъ рӯ ба беҳбудӣ оварда, мо боз ба анчоми парвозҳо бо хатсайрҳои амалкунанда идома медиҳем. Барои нороҳатиҳо аз мусофирон самимона узр мепурсем”, – илова кард Азиз Хайруллоев.
Бо мо дар Telegram, Facebook, Instagram, Viber, Яндекс.Дзен, OK ва Google Новости бимонед.
