Вазири корҳои хориҷии Тоҷикистон Сироҷиддин Муҳриддин зимни нишасти матбуотии имрӯза изҳор дошт, ки баҳри рӯ ба беҳбудӣ овардани муносибатҳо бо Эрон Тоҷикистон ҳамаҷониба кӯшиш ба харҷ медиҳад.
“Эрон аввалин давлатест, ки соли 1991 соҳибистиқлолии Тоҷикистонро эътироф намуда, соли 1992 сафоратхонаи худро боз намуд. Ҳеҷ кас робитаҳои чандинасраи таърихӣ ва фарҳангӣ байни кишварҳои моро инкор карда наметавонад. То рӯйдодҳои 4 сентябри соли 2015 мунсибатҳо миёни кишварҳо хуб буд”, – қайд кард вазир ва ошӯби собиқ генерали Вазорати мудофиаи Тоҷикистон Абдуҳалим Назаровро хотиррасон намуд.
Бино ба гуфтаи ӯ, сабаби аслии ба сардӣ гароидани муносибатҳо байни Тоҷикистону Эрон воқеаҳои санаи 4 сентябр шуморида шуда, онҳо нишон доданд, ки “бархе аз сохторҳои иқтисодӣ ва молиявии Эрон аз Ҳизби наҳзати исломӣ пуштибонӣ менамоянд, ки он дар навбати худ ошӯби генерали Вазорати мудофиаро дастгирӣ кард”.
“Ин масъаларо бо Эрон баррасӣ дорем, лекин то ҳол ин мушкил роҳи ҳалли худро пайдо накардааст. Аз ин рӯ, метавон гуфт, ки мушкилот байни Тоҷикистону Эрон танҳо дар масоили сиёсӣ ҷой доранд. Аммо инро мушкилоти бузург наметавон номид. Дар масоили иҷтимоӣ ва иқтисодӣ мо мушкилот надорем”, – қайд кард Муҳриддин.
Ба сифати далел дар масъалаи хуб будани муносибатҳо дар ин самтҳо вазир илова намуд, ки айни замон ширкатҳои эронӣ дар сохтмони нерӯгоҳи Роғун иштирок доранд.
“Мо бо Эрон лоиҳаҳоимуштаркаки зиёд дорем, аз ҷумла нерӯгоҳи барқи обии Сангтӯда-2, нақби Истиқлол ва ғайра”, – зикр кард вазир.
Ба ҷуз ошӯби зикршуда, ба бад шудани муносибатҳо байни Тоҷикистону Эрон иштироки раиси Ҳизби фаъолияташ дар Тоҷикистон манъшудаи наҳзати исломӣ Муҳиддин Кабирӣ дар конфронси сатҳи баланд дар Эрон моҳи декабри соли 2015 низ боис гардид.
Пас аз ин муносибатҳои дипломатӣ бо Эрон боз бештар бад шуда, намояндагии Эрон дар Хуҷанд фаъолияташро қатъ намуд. Ҳамчунин чанде аз соҳибкорони эронӣ ба тиҷорати худ дар Тоҷикистон хотима бахшиданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
