Давлатшо Юсупов – сокини 60-солаи ноҳияи Рӯдакӣ, яке аз бинокорони масҷиди бузурги Душанбе, ки дар шуъбаи эҳё бистарӣ гардида буд, шаби гузашта фавтид.
Сабаби марги ӯ ҷароҳатҳои зиёди вазнин будааст, ки дар пайи афтодан Д. Юсупов бардоштааст. Дар ин бора ба “Азия – Плюс” имрӯз, 27 феврал, муовини сардухтури Маркази миллии тиббии Тоҷикистон Сулаймон Табаров иттилоъ дод.
“Дар пайи афтодан аз баландӣ Давлатшо Юсупов ҷароҳати зиёд бардошта буд, аз ҷумла, осеби пӯшидаи косахонаи сар, ларзиши майнаи сар, садамаи пӯшидаи қафаси сина, шикасти қабурғаҳои 3, 4, 5 аз тарафи рост, кафидани шуши рост, кафидани ҷигар. Инчунин, бемор бо як гурда фаъолият мекардааст, ки ин низ яке аз сабабҳои марги ӯ гардид. Яъне духтурон натвонистанд ӯро наҷот диҳанд”,- гуфт Сулаймон Табаров.
То ҳол як нафар коргари дигаре, ки аз зинапояи масҷид афтода буд, дар шуъбаи эҳё боқӣ мемонад. Ӯ бо ҷароҳати ҷунбиши майнаи сар бистарӣ гардидааст. Сулаймон Табаров вазъи ӯро “беҳтар” унвон кард.
Вазъи се нафари дигар, ки дар шуъбаи ҷарроҳии асаб бистарӣ гардидаанд, нисбатан хуб гуфта мешавад. Аммо ба ҳар ҳол зери назорат қарор доранд.
Се нафар коргари ҷароҳатҳои нисбатан сабук бардошта, дар бинои 4-уми Маркази миллии тиббӣ бистарӣ шудаанд. Онҳо худро хуб ҳис мекунанд.
Ёдовар мешавем, ки 25 феврал дар масҷиди бузурги Душанбе, дар натиҷаи шикастани зинапояи сохтмонӣ, 9 нафар бинокор аз болои он афтода, бо ҷароҳатҳои гуногун дар беморхона бистарӣ гардиданд. Баландии зинапоя беш аз 30 метр гуфта мешавад.
То ҳол касе аз масъулин ё худи ҷароҳатбардоштагон нагуфтаанд, ки сабаби аслии шикастани зинапоя чӣ буд. Рӯшан нест, ки онҳо қоидаҳои бехатарӣ ҳангоми кор дар сохтмонро риоя мекарданд ё не.
Дар ҳамин ҳол, прокуратураи шаҳри Душанбе вобаста ба ҳодисаи мазкур бо моддаи 190-и (Вайрон кардани қоидаҳои бехатарии корҳои кӯҳӣ,сохтмон ва дигар корҳо1) Кодекси ҷиноии ҶТ парвандаи ҷиноӣ боз кардааст. Дар ин бора аз Прокуратураи генералӣ ба “Азия-Плюс” иттилоъ доданд.
Барои вайрон кардани талаботи ин моддаи қонун, ҷарима дар ҳаҷми аз чорсад то ҳаштсад нишондиҳанда барои ҳисобҳо ё маҳдуд кардани озодӣ ба мӯҳлати то се сол ё маҳрум сохтан аз озодӣ ба ҳамин мӯҳлат ҷазо пешбинӣ шудааст. Агар ин ҳодиса боиси марги инсон шуда бошад, ҷазо дар шакли маҳдуд кардани озодӣ ба мӯҳлати то панҷ сол ё маҳрум сохтан аз озодӣ баҳамин мӯҳлат пешбинӣ гардидааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
