Гармидиҳӣ ба бинову иншооти қисмати шарқӣ ва ғарбии пойтахт қатъ шуда, ба кисмати марказии шаҳр идома дорад.
Аз санаи 1 апрел дегхонаҳои Ғарбӣ ва Шарқӣ дар робита ба анҷоми мавсими гармидиҳӣ ба кори худ хотима бахшиданд, хабар доданд ба “Азия-Плюс” аз Муассисаи давлатии «Шабакаҳои гармидиҳандаи шаҳри Душанбе».
Бино ба иттилои манбаъ, бинобар сабаби зарурати истеҳсоли нерӯи барқ дар Марказҳои барқу гармидиҳӣ, то ҳол ба қисмати марказии шаҳр гармӣ дода мешавад. Дар корхона аз кай қатъ шудани кори Маркази барқу гармидиҳӣ огаҳӣ надоранд.
Зимнан шарҳ дода шуд, ки чунин қарорҳо дар сатҳи ҳокимият қабул шуда, шабакаҳои гармидиҳӣ иҷрокунандагони он мебошанд.
Аз ширкати “Барқи тоҷик” ва мақомоти шаҳрдории пойтахт дастрас кардани маълумот дар бораи вақти анҷоми мавсими гармидиҳӣ муяссар нашуд.
Сокинони шаҳр аз ҳарорати беҳад гарм дар манзилҳои худ бинобар сабаби то ҳол гармӣ интиқол ёфтан ба онҳо шикоят доранд.
Мавсими гармидиҳӣ дар Душанбе ҳамасола нимаи моҳи ноябр оғоз гардида, то нимаи моҳи марти соли дигар идома меёбад. Тирамоҳи соли гузашта бошад, бо сабаби барвақт фаро расидани сардиҳо, интиқоли гармӣ даҳаи охири моҳи октябр оғоз шуд.
Аҳолии пойтахтро корхонаи «Шабакаҳои гармидиҳандаи шаҳри Душанбе» бо гармӣ таъмин мекунад, ки онро дар навбати худ аз Марказҳои барқу гармидиҳӣ ( корхонаҳои тобъеи ширкати “Барқи тоҷик”) мегирад.
Айни замон барои ҳар як метри мураббаъи манзил аҳолӣ ба МД «Шабакаҳои гармидиҳандаи шаҳри Душанбе» дар як моҳ 1,03 сомонӣ маблағ пардохт мекунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
