Дар идомаи сафари корӣ ба вилояти Суғд Президенти Тоҷикистон Эмомалӣ Раҳмон дар шаҳри Хуҷанд “Роҳи танобӣ”-ро аз Боғи фарҳангӣ-фароғатии ба номи Камоли Хуҷандӣ то Маҷмааи шоҳ Исмоили Сомонӣ аз болои дарёи Сир дар масофаи беш як километр мавриди истифода қарор дод.
Бино ба иттилои хадамоти матбуоти сарвари давлат, “Роҳи танобӣ” дар доираи эълони солҳои 2019-2021 ҳамчун Солҳои рушди деҳот, сайёҳӣ ва ҳунарҳои мардумӣ дар мавзеи хеле зебою дилписанд барои сайёҳони дохилию хориҷӣ- соҳили дарёи Сир ва Боғи ба номи Камоли Хуҷандӣ сохта шудааст.
Гуфта мешавад, “Роҳи танобӣ”, ки аз ҷониби соҳибкорони ватанӣ бунёд карда шудааст, дорои 47 кабина бо ғунҷоиши 4 нафар, аз ҷумла 7 кабинаи хизматрасонии олӣ мебошад.
Ин роҳ дар як вақт ба 160 нафар хизмат мерасонад. Баландии роҳи танобӣ дар сатҳи дарё 35 метрро ташкил дода, бо мавриди истифода қарор гирифтани он 16 нафар бо ҷойи кори доимӣ таъмин гардиданд.
Имрӯз сарвари давлат дар фестивали «Сайри гули лола» ва озмуни вилоятии «Гулҳо», ҳамчунин Фестивали "Таомҳои миллии наврӯзӣ" иштирок кард.
Дар фестивали «Сайри гули лола» ва озмуни вилоятии гулҳо аз ҷониби намояндагони 18 шаҳру ноҳияҳои вилояти Суғд зиёда аз 100 намуди лола, навъҳои гуногуни гулҳои ороишию ҳамешасабз ба намоиш гузошта шуда, ҳамзамон ҳунари рассомону нақшкашон, гулпарварону ороишгарон, ки дар мавзӯи лола бо тарзу услуби хос дар сатҳи хеле баланд офарида шудаанд, муаррифӣ гардид.
Дар доираи фестивали "Таомҳои миллии наврӯзӣ" беҳтарин ошпазҳои ҳамаи 18 шаҳру ноҳияи вилоят дар мавзеи тамошобобу хушбоду ҳавои соҳили дарёи Сир, ҷамъ омада, бештар аз 50 намуд таомҳои миллии наврӯзиро ба намоиш гузоштанд.
Ҳамин рӯз Сарвари давлат ҳамчунин дар маросими мавриди баҳрабардорӣ қарор гирифтани киштии рамзӣ-тарабхонаи “Темурмалик” дар шаҳри Хуҷанд иштиро кард.
Тарабхона аз ду ошёна ва тахҳона иборат буда, дар соҳили дарёи Сир ва шафати Боғи Камоли Хуҷандӣ сохта шудааст, ки ҷойи хеле хуби сайру саёҳати сокинону меҳмонони шаҳри Хуҷанд мебошад.
Дар таҳхонаи он қаҳвахона бо 100 ҷой, дар ошёнаи якум тарабхона бо 200 ҷойи нишаст ва дар ошёнаи сеюм майдончаи тобистона сохта шудааст. Масоҳати умумии тарабхона 631 метри мураббаъро ташкил медиҳад. Тарабхона аз ҷониби соҳибкори ватанӣ – роҳбари ширкати “Абдурашид” Абдурасул Раҷабов сохта шуда, ба хотири гиромидошти фарзанди фарзонаи миллат номи қаҳрамони халқи тоҷик Темурмаликро гирифтааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
