Дар давраи аз 16 то 17 апрел ба ҷуз Вилояти Мухтори Кӯҳистони Бадахшон, дар саросари Тоҷикистон боришоти шиддатнок пешгӯӣ мешавад.
Бино ба иттилои Агентии обуҳавошиносии ҷумҳурӣ, дар шаҳру навоҳии Душанбе, Ҳисор, Ёвон, Кӯлоб, Шӯрообод, Ховалинг, Муъминобод, Истаравшан ва Панҷакент боронҳои пайдарпайи шиддатнок дар назар аст.
Дар ноҳияҳои ҷудогонаи тобеи марказ (Дарбанд, Варзоб, Майхура) боронҳои селу раъду барқ ва жола аз эҳтимол дур нест. Рӯзона ҳарорат дар водиҳо то 8-10 дараҷа поин меравад.
Ҳамчунин зикр мегардад, ки бар асари боришоти зиёд дар рӯдхонаҳои доманаи қаторкӯҳи Хисор, дарёҳои Яхсу, Қизилсу (ҷанубӣ), Обихингов, Кофарниҳон, Элок, Сурхоб ҳамчунин шохаҳои дарёи Зарафшон (ноҳияи Паҷакент) болоравии сатҳи об пешбинӣ мешавад.
Дар ҳавзаҳои дарёҳои дар боло зикршуда ҳодисаҳои селфароӣ ва дар ноҳияҳои кӯҳистони ҷумҳурӣ (дар баландии беш аз 3000 метр) ҳолатҳои фаромадани тарма имкон дорад.
Дар шаҳри Душанбе боридани борон ва раъду барқ дар назар буда, ҳарорат рӯзона то 17-19 дараҷа гарм мешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
