Ин ҳафта Тоҷикистонро обуҳавои гарми тобистона фаро гирифта, ҳаво то ба 35 дараҷа гармӣ мерасад. Дар баъзе ноҳияҳои ҷануби кишвар ҳаво аз ин нишондиҳанда ҳам гармтар мешавад.
Чунин обуҳавои гарм, ки маъмулан ба фасли тобистон хос аст, то 15 май боқӣ мемонад, хабар доданд ба “Азия-Плюс” аз Маркази обуҳавошиносии Тоҷикистон.
Бино ба пешгӯии маркази мазкур, обуҳаво дар водиҳои ҷумҳурӣ дар ин давра асосан бебориш хоҳад буд.
“Дар минтақаи ҷануби кишвар ҳарорат 34-35, дар Душанбе – наздики 32-33 дараҷа гарм мешавад. Дар водиҳои вилояти Суғд гармшавии ҳаво то 30-35, доманакӯҳҳо – 25-29 ва дар кӯҳҳо 20-25 дараҷа дар назар аст. Дар ВМКБ низ обуҳавои гарми то 20-25 дараҷа пешгӯӣ мешавад”, – хабар дод ба “Азия-Плюс” сардори Маркази обуҳавошиносии ҷумҳурӣ Ҷамила Байдуллоева.
То охири ҳафта дар Душанбе обуҳавои камабри бебориш дар назар буда, ҳарорат рӯзона 28-32 ва шабона 9-13 дараҷа гарм мешавад.
Дар вилояти Хатлон низ то охири ҳафта обуҳавои камабри бебориш пешбинӣ шуда, ҳарорат рӯзона то 31-35 дараҷа гарм мешавад.
Дар вилояти Суғд низ обуҳавои камбари бебориш дар назар буда, то охири ҳафта ҳарорат рӯзона 26-33 ва шабона 10-15 дараҷа гарм мешавад.
То охири ҳафта дар Вилояти Мухтори Кӯҳистони Бадахшон обуҳавои камабри бебориш пешгӯӣ шуда, ҳарорат дар ғарби вилоят шабона 2-7 ва рӯзона 17-24 дараҷа гарм мешавад. Дар шарқи вилоят обуҳаво шабона 4-9 дараҷа сард шуда, рӯзона то ба 6-12 дараҷа гармӣ мерасад.
Ба ҳамсояҳо чӣ гуна обуҳавои пешгӯӣ мешавад?
Ин ҳафта баъзе минтақаҳои Ӯзбекистонро низ обуҳавои хеле гарм фаро мегирад. Тибқи пешгӯии “Узгидромет”, ҳарорат аз меъёри муқарраршуда 5 дараҷа боло меравад, хабар медиҳад CA-NEWS (UZ).
Дар қисмати асосии ҳамсоякишвар ин ҳафта ҳарорат рӯзона 30-35 ва шабона 15-20 дараҷа гарм мешавад. Дар шаҳрҳои Қаршӣ ва Тирмиз, ки дар қимати ҷанубтарини Ӯзбекистон воқеанд, ҳарорат то 39 дараҷа гармӣ боло меравад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
