Шамил Атахонов, ноиб-сарвазири пешини Қирғизистон рӯзи 21 май дар доираи парвандаи озодсозии ғайриқонунии ҷинояткори бонуфуз Азиз Батукаев боздошт ва бозпурсӣ шуд.
Бино ба иттилои Бахши хабарии Осиёи Марказӣ, соли 2013 додгоҳи шаҳрии Норини Қирғизистон дар асоси ташхиси табибон қарори пеш аз муҳлат озод кардани Азиз Батукаевро қабул кард. Батукаев ҳамон рӯзи озодшавиаш аз Бишкек ба Русия парвоз кард. Ин ҳодиса баҳси густардаеро ба миён овард.
Гуфта мешавад, Отурбек Ҷамшедов, додситони кулли Қирғизистон 17 апрели соли ҷорӣ хабар дод, ки баррасии парвандаи раҳошавии ғайриқонунии Батукаев дубора рӯи даст гирифта шудааст.
Баъди он табиб Эмил Макимбетов боздошт шуд. Ӯро дар додани ҳуҷҷати қалбакӣ дар бораи бемории табобатнашаванда доштани Батукаев айбдор мекунанд. Баъдтар се табиби дигар боздошт шуд. Вазири пешини тандурустии Қирғизистон Динора Сагинбоева ва мушовири пешини раиси маҳбасҳои Қирғизистон Калибек Качкиналиевро ҳам боздошт карданд.
