Хадамоти зиддиинҳисории назди ҳукумати Тоҷикистон се ширкатро ба рӯйхати субъектҳои хоҷагидоре шомил кард, ки дар бозори хизматрасонии контент-провайдерҳо мавқеи ҳукмфарморо ишғол мекунанд.
Бино ба иттилои дафтари матбуоти Хадамоти зиддиинҳисории ҷумҳурӣ, Хадамот дар мавриди фаъолияти 3-субъектҳои хоҷагидор – контент-провайдерҳое, ки дар самти хизматрасонии мазкур дар соли 2018 фаъолият намуданд, вобаста ба ҳолати риояи талаботи қонунгузории зиддиинҳисорӣ санҷиши интихобии баргузор намуд.
Гуфта мешавад, дар рафти санҷиш, мувофиқи маълумотҳои пешниҳоднамудаи операторони алоқаи мобилӣ муайян гардид, ки соли 2018 хизматрасонии контент-провайдерҳо зиёда аз 74%-аш ҶДММ «Юнифан», ҶДММ «Интернет ва технологияи мобилӣ», ҶДММ «Интерсолер-Т» ва боқимонда 25,5% ба дигар субъектҳои хоҷагидор тааллуқ дорад.
“Аз ин рӯ, дар асоси маълумотҳои расмии операторони мобилӣ барои ҷамъбасти соли 2018 аз рӯи хизматрасонии контент-провайдерӣ, ҶДММ «Юнифан», ҶДММ «Интернет ва технологияи мобилӣ» ва ҶДММ «Интерсолер-Т», ки дар маҷмӯъ ҳиссаи молии онҳо зиёда аз 74,3%-и бозори молии мазкурро ташкил медиҳад, ба Феҳристи субъектҳои хоҷагидоре, ки дар бозори мол мавқеи ҳукмфармоиро доро мебошад, шомил карда шуда, минбаъд тарифҳои хизматрасонии онҳо дар мувофиқа бо Хадамоти зиддиинҳисорӣ амалӣ карда мешаванд”, – омадааст дар маълумоти Хадамот.
Қобили зикр аст, ки бар асоси моддаи 22 Қонуни ҶТ «Дар бораи ҳимояи рақобат» Хадамоти зиддиинҳисорӣ, дар доираи ваколат, ҳуқуқ ва вазифаҳои худ нархи мол, маҳсулот (кору хизматрасонӣ)-и пулакии мақомоти ҳокимияти давлатӣ, мақомоти иҷроияи маҳаллии ҳокимияти давлатӣ, мақомоти худидоракунии шаҳрак ва деҳот ва субъектҳои хоҷагидории ба доираи идоракунии онҳо дохилбуда, инчунин нарх (тариф)-ҳои хизматрасонии пулакии субъектҳои хоҷагидоре, ки дар бозори мол мавқеи ҳукмфармоиро дар бозори моли муайян доро мебошанд, ба мувофиқа мерасонад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
