Нимсолаи якуми соли 2019 дар вилояти Суғд ба маблағи 5,6 миллиард сомонӣ маҳсулоти саноатӣ истеҳсол карда шуд, ки нисбат ба ҳамин давраи соли 2018 бо назардошти индекси нархҳои истеҳсолкунандагони маҳсулоти саноатӣ 108,3 фоизро ташкил дод.
Дар ин бора зимни ҷаласаи фаъолон оид ба ҷамъбасти натиҷаҳои рушди иқтисодиву иҷтимоии вилоят дар нимсолаи якуми соли 2019 бо иштироки муовини якуми Сарвазири Ҷумҳурии Тоҷикистон Давлаталӣ Саид ва Раиси вилояти Суғд Раҷаббой Аҳмадзода маълумот дод шуд.
Бино ба иттилои хадамоти матбуоти раиси вилояти Суғд, имсол дар вилоят баистифодадиҳии 100 корхона бо 1030 ҷойи корӣ ба нақша гирифта шуда, дар давраи ҳисоботӣ 59 корхона бо 642 ҷойи корӣ таъсис дода шудааст.
Ҳаҷми маҳсулоти умумии кишоварзӣ дар моҳҳои январ – июни соли 2019 дар ҳамаи бахшҳои хоҷагӣ 1 миллиарду 850,5 миллион сомониро ташкил дода, (бо нархҳои муқоисавӣ) нисбат ба ҳамин давраи соли 2018 – ум 17,1 фоиз зиёд гардидааст.
Гуфта мешавад, гардиши савдои хориҷии вилояти Суғд 1011,9 миллион доллари амрикоиро ташкил дод, ки нисбат ба моҳҳои январ – июни соли 2018 – ум 0,7 фоиз ё 7 миллион доллар зиёд шудааст. Дар гардиши савдои хориҷӣ ба ҳиссаи мамлакатҳои ИДМ 80,7 фоиз ё 816,4 миллион доллар ва ба ҳиссаи мамлакатҳои хориҷи дур 19,3 фоиз ё 195,5 миллион доллар рост меояд.
Йайд мешавад, ки дар ин давра аз вилоят ба хориҷи кишвар ба маблағи 224,5 миллион доллар маҳсулот содирот гардид.
Раиси вилоят Раҷаббой Аҳмадзода соҳаҳои хоҷагии халқи вилоятро таҳлил намуда, ба масъулин баҳри тақвияти корҳои ободониву созандагӣ, иҷрои босифати нақшаи андозҳо, дастгирии соҳибкорон, ташкили корхонаҳои нави саноатӣ, дар сатҳи зарурӣ ба роҳ мондани истеҳсоли либосҳои мактабӣ, ҷалби сармоя ба иқтисодиёти вилоят, баланд бардоштани ҳосилнокии зироатҳо, таъмини рушди моҳипарварӣ, ҷалби гардишгарон ба вилоят, тарғиби имкониятҳои сайёҳии вилоят тавассути сомонаҳои интернетӣ, ташкили харитаи сайёҳӣ дар шаҳру ноҳияҳо супоришҳои мушаххас дод.
Ҳамчунин зикр гардид, ки ба истиқболи 30-солагии Истиқлолияти давлатии Тоҷикистон дар вилояти Суғд сохтмони 6500 иншооти гуногун ба нақша гирифта шуда, аз соли 2018 то инҷониб 2781 иншоот бунёд ва мавриди истифода қарор гирифтааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
