Омӯзгорони мактаби таҳсилоти умумии №34 ноҳияи Бобоҷон Ғафурови вилояти Суғд бо қарори суди маҳаллӣ барои ба дарсҳо ҳозир нашудани шогирдонашон ҳар кадоме ба маблағи 220 сомонӣ ҷарима шуданд, хабар медиҳад маркази матбуоти Прокуратураи генералии Тоҷикистон.
Муаллимаҳои ин мактаб Матлуба Раҳматуллоева ва Файзулло Файзуллоев мутобиқи моддаи 90-и Кодекси ҳуқуқвайронкунии маъмурии Тоҷикистон (Аз тарафи падару модар ё дигар намояндагони қонунии ноболиғон иҷро накардани ўҳдадориҳои парасторӣ ва тарбияи ноболиғон) ҷазо гирифтаанд.
Гуфта мешавад, чор нафар шогирдони М.Раҳматуллоева ба сурати умум дар 970 соат дарсҳо дар мактаб иштирок надоштаанд. Се шогирди Файзуллоев аз 42 то 93 соат дар машғулиятҳо ҳузур надошта, ба оворагардӣ машғул шудаанд.
Дар бораи чӣ гуна ҷазо гирифтани волидони хонандагон, ки ба дарсҳо ҳозир нашудаанд, маълумот дода намешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
