Вазири корҳои дохилии Тоҷикистон генерал-полковники милитсия Рамазон Раҳимзода дар робита ба лату кӯби бераҳмона ва таҳқири як ҷавони тоҷик аз ҷониби шаҳрвандони Русия ба унвони вазири корҳои дохилии Русия генерали политсия Владимир Колоколтсев барқия ирсол намуд.
Бино ба иттилои маркази матбуоти ВКД Тоҷикистон, дар барқияи вазир қайд мешавад, ки ин ҷиноят аз ҷониби скинхедҳои Россия (гурӯҳи миллатгароёни рус) содир шудааст.
Гуфта мешавад, Рамазон Раҳимзода худи ҳамон рӯзи нашр шудани навори видео дар ин хусус ба ҳамтои русиягии худ барқия ирсол намуда, хоҳиш кард, ки ҷиҳати саривақт ошкор кардани ҷинояти мазкур, ба ҷавобгарӣ кашидани ҷинояткорон ва таҳти назорати қатъӣ гирифтани тафтиши ин ҷинояти мудҳиш мусоидат намояд.
Инчунин, сохторҳои дахлдори Вазорати меҳнат, муҳоҷират ва шуғли аҳолии Тоҷикистон, ки ба ҳалли масъалаҳои муҳоҷирати меҳнатӣ машғуланд, вазифадор карда шуданд, ки бо ҳамтоёни худ дар Федератсияи Россия дар алоқа бошанд ва барои ошкор кардани ин ҷиноят кӯмак расонанд.
Зимнан зикр мегардад, ки намояндаи Вазорати корҳои дохилии Россия дар Сафорати Федератсияи Россия дар Тоҷикистон дар бораи ин ҳодиса огоҳонида шуд.
Дар навори видео дида мешавад, ки як гурӯҳ ҷавонон мардеро бераҳмона лату кӯб ва бо корд ба ӯ зарбаҳо мезананд.
Дар навор шунида мешавад, ки ҳамлагарон мардро тоҷик номида, барои он лату кӯб мекунанд, ки дар хонааш наистода, ба Русия омадааст. Дар ҳамин ҳол, дар навор муайян кардани дар кадом минтақаи Русия содир шудани ин ҷиноят ғайриимкон аст.
Ҳамчунин маълум нест, ки пас аз ин ҳодиса бо ин марди латукӯбшуда минбаъд чӣ ҳодисае рух додааст.
Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
