Ҳукумати Тоҷикистон лоиҳаи тағйироту иловаҳоро ба Кодекси ҷиноятии ҷумҳурӣ ҷиҳати баррасӣ ба парлумони кишвар фиристод, ки мувофиқи он муҷозот барои шиканҷа сангинтар мешавад, хабар доданд ба “Азия-Плюс” аз палатаи поёнии парлумони Тоҷикистон.
Дар сурати қабули тағйироту иловаҳо, шахсони гунаҳкор эътирофшуда ба истифодаи шиканҷа ба муҳлати аз 5 то 7 соли зиндон ҷазо гирифта метавонанд.
Дар Кодекси ҷиноятии амалкунандаи Тоҷикистон барои истифода аз шиканҷа бо мақсади ба даст овардани иқроршавӣ ба гуноҳ ё дигар маълумоти зарурӣ дар шакли аз ду то панҷ соли маҳрумият аз озодӣ ҷазо пешбинӣ шудааст.
Ёдрас мекунем, ки 25 июл Кумитаи ҳуқуқи башари СММ тавсияҳои ниҳоии худро ба Тоҷикистон дар мавриди аз ҷониби кишвар иҷро шудани Аҳдномаи байнулмилалӣ дар бораи риояи ҳуқуқҳои шаҳрвандӣ ва сиёсӣ ирсол намуд.
Тавсияҳо аз рӯи натиҷаҳои ҳисоботи ҳайати Тоҷикистон дар иҷлосияи 126-уми Кумитаи ҳуқуқи башари СММ дар Женева рӯзҳои 2-3 июл таҳия гардидааст. Ҳайати расмии Тоҷикистонро дар ин иҷлосия Прокурори генералии Тоҷикистонӣ Юсуф Раҳмон роҳбарӣ кард.
Он замон Кумита аз ҳукуматдорони тоҷик даъват ба амал овард, ки дар муассисаҳои ислоҳӣ истифодаи шиканҷа аз байн бурда шуда, рафтори башардӯстона бо ҳамаи маҳкумшудагон дар ҳама гуна ҳолатҳо таъмин ва аз таҷрибаи истифодаи шиканҷа бо мақсади гирифтани баёноти иқрошавӣ хотима бахшида шавад.
Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
