Фаъолияти 123 муассисаи дандонпизишкӣ (стоматологӣ), 81 сартарошхона ва 157 кошонаи ҳусн дар Тоҷикистон баъд аз санҷиши Хадамоти назорати давлатии тандурустӣ ва ҳифзи иҷтимоии аҳолӣ муваққатан қатъ шуд.
Тавре маркази матбуоти Вазорати тандурустӣ ва ҳифзи иҷтимоии аҳолии ҷумҳурӣ хабар медиҳад, давоми 9 моҳи соли равон мутахассисони хадамот барои риоя накардани қоидаҳои зиддиэпидемикӣ 97 муассисаи стоматологӣ, 127 сартарошхона ва 173 кошонаи ҳуснро ба маблағи умумии 111 ҳазору 295 сомонӣ ҷарима кардаанд.
Ҳамчунин зимни санҷиши муассисаҳои дорусозӣ 1031 номгӯй маводи доруворӣ ва 110 ҳазору 814 адад молҳои тиббӣ ва дигар мавод, ки муҳлати истифодаашон гузашта, гувоҳнома надоштанд ва ё ба талаботи ҳуҷҷатҳои меъёрию техникӣ ҷавобгӯ набуданд, мусодира шуданд.
Гуфта мешавад, нисбат ба шахсони воқеӣ ва ҳуқуқӣ, ки маводу молҳо аз онҳо мусодира гардиданд, парвандаи ҳуқуқвайронкунии маъмурӣ тартиб дода шуда, қонуншиканон ба маблағи умумии 996 ҳазору 630 сомонӣ ҷаримабандӣ шуданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
