Рӯзи шанбеи ҳафтаи сипаришуда, 26-уми октябр дар Маркази исмоилияи шаҳри Душанбе бо ташаббуси бунёди Оғохон Анҷумани китоб барои кӯдакон доир гардид.
Дар он муовини вазири маориф ва илм Латофат Назирӣ, раиси Иттифоқи нависандагони Тоҷикистон Низом Қосим, намояндагони Академияи таҳсолоти Тоҷикистон ширкат варзиданд.
Ҳадафи баргузории чорабиниро дастандаркорони он тарғиби мутолиаи китоб байни кӯдакону наврасон ва ҷавонон, ҳамчунин амалисозии яке аз бандҳои Стратегияи милии рушди маориф дар ҶТ то соли 2020, аз ҷумла, тартиб додани маҷмӯи нави китобҳои дарсӣ ва маводи таълимиву методӣ дар ҳамаи сатҳҳои таълим унвон карданд.
Маҳз дар ҳамин асос Бунёди Оғохон бо дастгирии сохторҳои давлатиии марбута ва ташкилотҳои ҷамъиятӣ 20 номгӯйи китобҳо барои кӯдаконро давоми солҳои 2018-2019 таҳия ва нашр кард, ки дар ин Анҷуман пешкаш гардиданд.
Сарвари иҷроияи Бунёди Оғохон дар Тоҷикистон Кишвар Абдулалишоев гуфт, ки дар бахши таълим ва рушди барвақтии кӯдакон созмони мазкур дар се самти муҳим фаъолият дорад.
Зикр шуд, ки Бунёди Оғохон мақомоти маҳаллиро тавассути сохтмону барқарорсозии мактабҳо дар ноҳияҳои дурдасти кӯҳистон дастгирӣ карда, ҷиҳати такмили сатҳи дониш дар кишвар барои омӯзгорон ва роҳбарони соҳаи маориф давраҳои омӯзишӣ ташкил мекунад.
Ҳамчунин айни замон Бунёд дар ҳамдастӣ бо Вазорати маориф ва илм китобҳоро барои муассисаҳои томактабӣ ва макотиби ибтидоӣ омодаи чоп мекунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
