Дар натиҷаи садамаҳои нақлиётии рӯзҳои истироҳат 5 кас фавтидааст. Яке аз онҳо писари панҷсола будааст, хабар медиҳад хадамоти матбуоти ВКД.
Рӯзи 27-уми октябр дар роҳи нақлиётгарди Душанбе – Данғара ронандаи автомашинаи тамғаи “ДЭУ-Ланос” Илҳом Мирзоеви 61-сола дар ҳудуди ҷамоати деҳоти Оқсӯ аз уҳдаи идораи воситаи нақлиёт набаромада, ба автомашинаи тамғаи “Лада-Приора” таҳти идораи Алишер Ҳакимзода бархӯрдааст. Дар натиҷа мусофирони автомашинаи тамғаи “ДЭУ-Ланос” Тоҷиддин Раҷабов, Анваршо Гулов ва Вайсиддин Мирзоев дар ҷойи ҳодиса ба ҳалокат расидаанд.
Ронандагони ду мошин ва як мусофири дигари автомашинаи тамғаи “ДЭУ-Ланос” ҷароҳатҳои гуногуни ҷисмонӣ бардошта, бистарии беморхона шудаанд.
Дар ин рӯз ронандаи автомашинаи тамғаи “ВАЗ-21011” Алиқул Янгихонови 77-сола ҳангоми ҳаракат дар роҳи автомобилгарди деҳаи Ӯзбекистони шаҳри Ҳисор аз уҳдаи идораи воситаи нақлиёт набаромада, пиёдагарди панҷсола Саид Раҳмоновро пахш карудааст. Писари хурдсол дар беморхона фавтидааст.
Ҳамчунин рӯзи 26-уми октябр ронандаи автомашинаи тамғаи “ВАЗ-2106” Охун Исматуллоев сокини дар ҳудуди ноҳияи Рӯдакӣ пиёдагарди шахсияташ номаълуми тахминан 30-35-соларо пахш кардааст. Дар натиҷа пиёдагард дар ҷойи ҳодиса ба ҳалокат расидааст.
Аз рӯйи ин ҳодисаҳо таҳқиқот идома дорад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
