Ба Маҷлиси намояндагони Маҷлиси Олии Тоҷикистон тағйироту иловаҳо ба буҷети давлатӣ барои тасдиқ пешниҳод шуд, ки аллакай аз оғози ҳамин сол мавриди амал қарор гирифтааст.
Дар ҷаласаи имрӯзаи палатаи поёнии парлумон вакилон тағйирот ба қонун “Дар бораи Буҷети давлатии ҶТ барои соли 2019”-ро маъқул шумориданд.
Ба гуфтаи муовини вазири молия Карим Гулмуродзода, тағйироти пешниҳодшуда ба озод кардани ҶСП “Агротехсервис” (шаҳри Ҳисор) аз пардохти боҷи гумрукӣ ва андоз аз арзиши иловашуда (ААИ) аз оғози сол зимни ворид кардани қисмҳои эҳтиётӣ барои васлу насби техника ва мошинҳои кишоварзӣ дахл дорад.
Мувофиқи ин тағйирот, корхонаи мазкур ҳамчунин аз пардохти ААИ ҳангоми аз як ҷой ба ҷойи дигар интиқол додани маҳсулоти тайёр озод карда мешавад.
Раиси палатаи поёнии парлумон Шукурҷон Зуҳуров аз он изҳори нигаронӣ кард, ки корхона аз ин имтиёзҳои андозӣ аз оғози сол истифода бурда, тағйироти дахлдор аз ҷониби вакилон баъди гузашти 10 моҳ сурат мепазирад.
“Ин дуруст нест. Лоиҳаро саривақт пешниҳод ва ҳамаи инро ҳангоми таҳияи буҷет дар соли гузашта пешбинӣ кардан лозим буд, ё дар аввали сол онро мебоист таҳия ва пешниҳод кард”, – гуфт ӯ.
Шукурҷон Зуҳуров аз намояндаи Вазорати молия дархост кард, ки минбаъд ин эродҳо ба назар гирифта шаванд.
Корхонаи муштараки Тоҷикистону Беларус “Агротехсевис” воқеъ дар шаҳри Ҳисор моҳи майи соли гузашта бо иштироки сарони ҳар ду кишвар мавриди истифода қарор гирифт. Дар ин корхона техника ва мошинҳои истеҳсоли Беларус васлу насб мешаванд.
Муовини вазири молия қайд кард, ки тӯли 9 моҳи соли 2019 дар ин корхона 160 адад техника ва мошинҳои кишоварзӣ, аз ҷумла, 92 трактори “Белорус” истеҳсол шудааст. Ҳудуди 40 адади онҳо, аз ҷумла, 16 трактор ба кишвари ҳамсояи Ӯзбекистон содирот шудааст.
Дар ҳамин ҳол, дар нуҳ моҳи соли ҷорӣ ба буҷети давлатии Тоҷикистон аз нақшаи пешбинишуда беш аз 680 млн. сомонӣ (зиёда аз 70 млн. доллар) камтар маблағ ворид гардидааст.
Мувофиқи маълумоти фаврии Вазорати молия, ҳаҷми умумии буҷети давлатӣ дар моҳҳои январ-сентябри соли 2019 ҳудуди 16,7 млрд. сомониро ташкил додааст, ки аз нақшаи пешбинишуда 3,9% камтар мебошад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
