Вазорати корҳои хориҷии Тоҷикистон ба 7 корманди Радиои Озодӣ иҷозаи фаъолият (аккредитасия) дод.
Салим Аюбзод, роҳбари бахши тоҷикии ин радио дар саҳифаи фейсбукии худ чунин навиштааст: “Самимона сипосгузорем аз ВКХ Тоҷикистон, ки имрӯз ба 7 корманди мо аккредитатсия дод! Кам нашавед! Тандуруст ва сарбаланд бошед!”
Зимни суҳбат бо хабарнигори “Азия-Плюс” Салим Аюбзод изҳор дошт, ки ба видео-журналистон Амриддин Олимов ва Таҳмина Ҳакимова, веб-муҳаррирон Муҳаммадвафо Раҳматов ва Наргис Ҳамробоева, хабарнигор ва наворбардори лоиҳаи телевизионии «Настоящее Время» Анӯшервон Орифов ва Насим Исомов, ҳамчунин хабарнигор Алишер Зарифӣ аккредитатсия дода шудааст.
“Дархост барои гирифтани эътиборномаҳои Мирзонабӣ Холиқзода, Шодмони Ятим, Барот Юсуфӣ ва дигар кормандон айни замон дар ВКХ баррасӣ мешавад”, – гуфт ӯ.
Ёдрас мекунем, ки муддати шаш моҳ инҷониб хабарнигорони Радиои Озодӣ, ки муҳлати аккредитатсияи онҳо ба анҷом расида буд, дубора онро дастрас карда наметавонистанд.
Идораи радио чандин маротиба дар ин бора ба ВКХ муроҷиат кард. Барои мулоқоти хусусӣ президенти Радиои Аврупои Озод/Радиои Озодӣ Ҷейми Флай омада буд, аммо вобаста ба бозхонд ва надодани аккредитатсияи хабарнигорон ҳеҷ шарҳе ба даст наоварда буд.
Мирзонабии Холиқзод, иҷрокунандаи вазифаи роҳбари дафтари Радиои Озодӣ дар Душанбе қаблан изҳор дошта буд, ки тамоми ин муддат дафтари кории онҳо дар “ҳолати интизорӣ” кор мекард.
“Дар бораи 6 хабарнигори мо ба ин маъно ишора карда, гуфтанд: “Ба онҳо аккредитатсия дода намешавад ва онҳо метавонанд дар расонаҳои маҳаллӣ кори худро идома диҳанд. Инро ҳам бояд бигӯям, ки дар ҳоли ҳозир мақомоти Радиои Озодӣ бо Вазорати корҳои хориҷии Тоҷикистон музокира пеш бурда истодаанд. Мо умедвор ҳастем, ки шояд Вазорати корҳои хориҷии Тоҷикистон таҷдиди назар карда, як ҳаракати мусбат дар нисбати ҳамкорони мо зоҳир кунад”, – гуфта буд ӯ.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
