ВКД Тоҷикистон муайян кардааст, аксари шахсоне, ки шаби 6-уми ноябр ба дидбонгоҳи сарҳадӣ ҳуҷум карданд, шаҳрвандони Тоҷикистон ва зодагони минтақаи шимоли ҷумҳурӣ мебошанд.
Дар ин бора ба “Азия-Плюс” котиби матбуотии ВКД Тоҷикистон Умарҷони Эмомалӣ хабар дод. Дар бораи аз кадом маҳалли минтақаи шимоли кишвар будани онҳо маълумоти саҳеҳ дода нашуд.
Ба гуфтаи ӯ, байни ҳамлаварон занон ҳам будаанд. Кори гурӯҳи фаврӣ-тафтишотӣ оид ба муайян кардани шахсияти ҳамлаварон ба дидбонгоҳи сарҳадии “Ишқобод” идома дорад.
“Аз рӯйи далели ҳуҷум ба дидбонгоҳи сарҳадӣ Прокуратураи генералии Тоҷикистон парвандаи ҷиноятӣ оғоз кард”, – афзуд ӯ, вале дар шарҳи моддаҳои парванда душворӣ кашид.
Як манбаи “Азия-Плюс” дар Прокуратураи генералӣ изҳор дошт, ки айни замон дар мавриди ин ҳодиса бо моддаҳои “терроризм, одамкушӣ, ғайриқонунӣ гузаштани сарҳад” парвандаи ҷиноятӣ оғоз шудааст.
“Дар ҷараёни тафтиш бо моддаҳои дигари КҶ ҶТ низ парвандаҳои ҷиноятӣ оғоз шуда метавонанд”, – гуфт манбаъ.
Дар ҳамин ҳол, Вазорати дифои Афғонистон хабари аз қаламрави он кишвар ба Тоҷикистон гузаштани ҷангҷӯёни гурӯҳи тундрави "Давлати исломӣ" ва ҳамлаи онҳо ба як дидбонгоҳи марзиро рад кардаанд.
Масъулони Вазорати дифои Афғонистон рӯзи 7-уми ноябр гуфтанд, "ҳамла дар хоки Тоҷикистон анҷом шудааст ва ҳаросафканон низ дар берун аз хоки Афғонистон ба сар мебурдаанд”.
Ба иттилои КДАМ Тоҷикистон, шаби 6-уми ноябр гурӯҳи мусаллаҳи иборат аз 20 нафар бо истифода аз силоҳи оташфишон ба дидбонгоҳи сарҳадии №4-и «Ишқобод»-и қисми ҳарбии отряди сарҳадии «Султонобод» дар наздикии марзи Тоҷикистону Ӯзбекистон ҳуҷум карданд.
Тибқи маълумоти расмии сохторҳои қудратии Тоҷикистон, дар ин задухӯрди мусаллаҳона 1 сарбози Қӯшунҳои сарҳадӣ ва 1 корманди Вазорати корҳои дохилии ҶТ фавтида, 15 тан аз ҷангиён безарар гардонида шуданд. КДАМ аз боздошти 5 нафар ҷангиёни зиндамонда ва бозпурсии онҳо хабар дод.
Мувофиқи маълумоти маркази матбуоти Қӯшунҳои сарҳадии КДАМ ҶТ, ин ҳамларо аъзои гурӯҳи террористии “Давлати исломӣ”, ки аз Афғонистон омадаанд, анҷом доданд.
Дар ҳамин ҳол, тавре Радиои Озодӣ хабар медиҳад, дар ҳамла ба дидбонгоҳи "Султонобод" дар сарҳади Тоҷикистону Ӯзбекистон 4 марзбон ва 1 маъмури милиса кушта шудаанд.
Ҳукумати Тоҷикистон то ҳол кушта шудани корманди мақомоти умури дохилӣ Баҳром Қосимзода ва марзбон Иззатулло Латифовро тасдиқ кард.
Ҳамсуҳбатони Радиои Озодӣ гуфтанд, ки дар ҳодисаи рӯзи 6-уми ноябр се марзбони дигар – Диловар Толибов, муовини сардори дидбонгоҳи "Султонобод" ва сарбозон Ҳофиз Ҳасанов ва Ғаниҷони Давлат ҷон бохтанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
