Шуъбаи амнияти дохилии Прокуратураи генералии Тоҷикистон барҳам дода шуд. Тавре торнамои “Адлия” иттилоъ медиҳад, фармонро дар ин хусус раисҷумҳури Тоҷикистон Эмомалӣ Раҳмон ҳанӯз 1-уми ноябр имзо кардааст.
Тағйирот ба фармони президент аз 14-уми августи соли 2015 (№539) “Дар бораи сохтори Дастгоҳи марказӣ ва тартиби идораи Прокуратураи генералии Ҷумҳурии Тоҷикистон” мутобиқи моддаи 56-и Қонуни ҶТ “Дар бораи санадҳои меъёрӣ-ҳуқуқӣ” ворид шудааст.
“Аз банди 1 фармони президенти Тоҷикистон аз 14 августи соли 2015 (№539) “Дар бораи сохтори Дастгоҳи марказӣ ва тартиби идораи Прокуратураи генералии Ҷумҳурии Тоҷикистон” сархати шонздаҳум “Шуъбаи амнияти дохилӣ” хориҷ карда шавад”, – омадааст дар Фармон аз 1-уми ноябр (№1372).
Ёдрас мекунем, ки бинобар самаранок набудани фаъолият ва ҷой доштани ҳолатҳои коррупсионӣ, қаблан чунин шуъбаҳо дар ду мақомоти давлатӣ, аз ҷумла, Агентии назорати маводи нашъаовар ва Хадамоти гумрук низ барҳам дода шуданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
