Маҷлиси навбатии Ҳукумати ҶТ имрӯз, 27-уми ноябр таҳти раёсати Эмомалӣ Раҳмон баргузор шуд. Дар он сарвари давлат таваҷҷуҳи аъзои ҳукуматро ба масъалаи таъмини соҳаҳои иҷтимоӣ бо гармӣ ва маводи сӯзишворӣ дар мавсими сармо ҷалб кард.
Тибқи иттилои хадамоти матбуоти сарвари давлат, дар ҷараёни маҷлис ҳамчунин гузориши директори Агентии омори назди Президенти ҶТ Гулнора Ҳасанзода дар бораи Стратегияи миллии рушди омори Ҷумҳурии Тоҷикистон барои давраи то соли 2030 ва дар бораи Барномаи корҳои оморӣ барои соли 2020 шунида шуд.
Таъкид гардид, ки чунин лоиҳаи қарори Ҳукумати ҶТ сеюмин барномаи бисёрсолаи мақомоти омори давлатӣ маҳсуб шуда, ба таҳкими низоми омори миллӣ, таъмини муқоисапазирии иттилооти омори расмӣ дар сатҳи байнулмилалӣ, таъмини фарогирии пурраи субъектҳои хоҷагидор, пайгирии нишондиҳандаҳои Стратегияи миллии рушди Ҷумҳурии Тоҷикистон то соли 2030, нишондиҳандаҳои Ҳадафҳои Рушди Устувор, беҳтар кардани ташаккули омори байниидоравӣ, таъсиси шабакаи ягонаи ҷамъоварии иттилооти омории ҷавобгӯйи стандартҳои миллӣ ва байнулмилалӣ равона мешавад.
Раисҷумҳур ба Агентии омор ва масъулини дигар вазорату идораҳои дахлдор ҷиҳати иҷрои босамари Стратегияи миллии рушди омор супоришҳо дод.
Дар кори маҷлис лоиҳаҳои як қатор қонунҳо ва пешниҳоди хулосаи Ҳукумати ҶТ, аз ҷумла, “Дар бораи хизматрасониҳои давлатӣ”, оид ба ворид намудани тағйиру иловаҳо ба Кодекси мурофиавии иқтисодии Ҷумҳурии Тоҷикистон, ворид намудани тағйиру иловаҳо ба Кодекси андози Ҷумҳурии Тоҷикистон”, ворид намудани тағйиру иловаҳо ба Қонуни ҶТ “Дар бораи ипотека”, ворид намудани илова ба Қонуни ҶТ “Дар бораи санҷиши фаъолияти субъектҳои хоҷагидор” ва пешниҳоди хулосаи ҳукумат ба лоиҳаи Қонуни ҶТ “Дар бораи танзими давлатии нархгузорӣ”-ро муҳокима шуда, барои баррасӣ ба Маҷлиси намояндагони Маҷлиси Олии ҶТ ирсол гардиданд.
Ҳамчунин масъалаҳо дар бораи Барномаи таълим ва тарбияи ҳуқуқии шаҳрвандони ҶТ барои солҳои 2020-2030, дар бораи Қоидаҳои ташкили хизматрасонӣ ба мусофирони хатсайрҳои байнулмилалӣ дар фурудгоҳҳои Тоҷикистон ва дар бораи муайян намудани мақоми ваколатдори давлатӣ дар соҳаи танзими низоми иҷозатномадиҳиро баррасӣ шуданд.
Эмомалӣ Раҳмон барои иҷрои саривақтии супоришҳо ба аъзои Ҳукумати ҶТ, вазорату идораҳо ва мақомоти иҷроияи ҳокимияти давлатии шаҳру ноҳияҳо дастурҳои мушаххас дод.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
