Бо даъвати Комиссияи марказии интихоботи Ӯзбекистон ҳайати Тоҷикистон дар пайгирӣ (мониторинг)-и маъракаи интихоботи парлумонӣ дар Ӯзбекистон ба ҳайси нозирон иштирок мекунанд.
Тавре ба “Азия-Плюс” аз Вазорати корҳои хориҷии ҷумҳурӣ хабар доданд, ба ҳайат роҳбарони Комиссияи марказии интихобот ва раъйпурсӣ (КМИР)-и Тоҷикистон Бахтиёр Худоёрзода, МТС Диловар Қодирзода, Ваколатдор оид ба ҳуқуқи инсон Умед Бобозода, ёвари президенти ҶТ оид ба масоили ҳуқуқӣ Зариф Ализода, вакили палатаи поёнии парлумон, роҳбари гурӯҳи дӯстӣ бо парлумони Ӯзбекистон Зуфар Исмоилзода ва сиёсатшинос Абдуғанӣ Мамадазимов шомил гардида, субҳи имрӯз озими Тошканд шуданд.
Барои инъикоси ҷараёни баргузории маъракаи интихоботи парлумонӣ дар кишвари ҳамсоя як гурӯҳи рӯзноманигорони тоҷик низ ба Тошканд мераванд. Маъракаи интихоботии мазкур таҳти шиори “Ӯзбекистони нав – интихоботи нав” ҷараён мегирад.
Интихоби вакилон ба Палатаи қонунгузори Олий Мажлиси Ӯзбекистон ва кенгашҳои маҳаллӣ рӯзи 22-юми декабр баргузор мешавад.
Дар интихобот 5 ҳизби сиёсӣ – Ҳизби демократии "Миллий тикланиш", Ҳизби сотсиал-демократии "Адолат", Ҳизби халқии демократии Ӯзбекистон, Ҳаракати соҳибкорон ва тоҷирон – Ҳизби либералӣ-демократӣ ва Ҳизби экологӣ иштирок мекунанд.
Ин маъракаи сиёсӣ дар соли 2019 бори нахуст мутобиқи Кодекси нави интихобот гузаронида мешавад. Мувофиқи он аҳзоби сиёсӣ ба пешбарии номзадҳо акнун натанҳо дар 135, балки ҳамаи 150 ҳавзаи интихоботӣ ҳуқуқ доранд.
Ба 150 курсии вакилӣ дар Палатаи қонунгузори Олий Мажлиси Ӯзбекистон 750 нафар номзадҳо довталабӣ мекунанд.
Аз 20 млн. интихобкунанда 2 млн. нафарашон ҷавонон буда, ин интихобот барояшон аввалин аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
