Нимаи дуюми рӯзи 30-юми декабр раисҷумҳури Тоҷикистон Эмомалӣ Раҳмон бо президенти Ӯзбекистон Шавкат Мирзиёев суҳбати телефонӣ анҷом дод.
Бино ба иттилои хадамоти матбуоти сарвари давлат, зимни суҳбат сарони ду давлат дар фазои дӯстона якдигарро бо фарорасии Соли нав самимона табрик ва ба мардуми бародари тоҷику ӯзбек бурдборӣ, сулҳ ва шукуфоӣ орзу карданд.
Эмомалӣ Раҳмон ва Шавкат Мирзиёев суръати баланди рушди босамари муносибатҳои шарикии стратегии Тоҷикистону Ӯзбекистонро бо назардошти манфиатҳои бунёдии ду халқи наздик ва тамоми минтақа бо қаноатмандӣ зикр намуданд.
“Президенти Тоҷикистон ба минбаъд идомаи мантиқӣ ёфтани муносибатҳои ду кишвар дар ин маҷро изҳори итминон карда, аз омодагии ҷониби Тоҷикистон барои фаъолияти муштарак дар ин самт таъкид намуд”, – омадааст дар хабар.
Зимни суҳбати телефонии Эмомалӣ Раҳмон бо президенти Қирғизистон Сооронбой Жээнбеков сарони давлатҳо якдигарро бо фарорасии Соли нав табрик гуфта, ба унвони мардумони ҳар ду давлат табодули таманниёти нек карданд.
Раисҷумҳурони Тоҷикистон ва Қирғизистон барои рушди минбаъдаи қобили мулоҳизаи муносибатҳои тоҷикону қирғизҳо ибрози назар карда, гомҳои муайяни мусбати ҷонибҳоро дар ин самт таъкид сохтанд.
Эмомалӣ Раҳмон мақсадҳои ҷониби Тоҷикистонро барои минбаъд низ равона кардани кӯшишҳои зарурӣ ҷиҳати ғанӣ гардонидани муносибатҳои неки ҳамсоядории тоҷикону қирғизҳо бо иқдоми нави амалӣ мутобиқ ба манфиатҳои дарозмуддати ду халқи бародар зикр намуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
