Ҳукумати Тоҷикистон барои дастгирии соҳибкорони истеҳсолкунанда ва содиркунандагони маҳсулоти ватанӣ бонк таъсис медиҳад.
Бонк дар назди “Фонди дастгирии соҳибкории назди ҳукумати Тоҷикистон” таъсис дода мешавад.
Тавре ба “Азия-Плюс” аз Фонди мазкур иттилоъ доданд, корҳои таъсиси бонк бо дастури раисҷумҳури Тоҷикистон Эмомалӣ Раҳмон аллакай оғоз шудаанд.
Бонк баҳри дастгирии молиявии намояндагони тиҷорати хурду миёна, ки ба истеҳсолот машғуланд, ҳамчунин содиркунандагои маҳсулоти ватанӣ бунёд мешавад.
Ин муассисаи қарзӣ аз ҳисоби маблағҳои ҳукумати ҷумҳурӣ сармоягузорӣ хоҳад шуд. Дар назар аст, ки бонк аз соли оянда ба фаъолият шурӯъ мекунад.
Дар Фонд қайд карданд, ки қарзҳо дар бонки нав бо меъёри фоизии нисбатан пасттар пешниҳод хоҳанд шуд.
“Фонди дастгирии соҳибкорӣ” соли 2013 таъсис ёфт. Он ба соҳибкорони маҳаллӣ ба муҳлати то се сол бо меъёри 12 фоизи солона қарз медиҳад.
Қарзҳо маъмулан ба соҳибкорони истеҳсолкунанда ва содиркунандагони маҳсулот дода мешавад.
То ин замон Фонд ба наздики 300 нафар соҳибкорон ва содиркунандагони маҳсулот қарз додааст.
Ҳаҷми сандуқи қарзии Фонд айни замон беш аз 200 млн. сомониро ташкил медиҳад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
