Дар нишасти хабарӣ муовини аввали ёвари Котиби давлатии ИМА оид ба умури Осиёи Ҷанубӣ ва Марказӣ Элис Уэллс гуфт, амалҳои террористӣ дар Тоҷикистон гувоҳи онанд, ки ҳамкории амниятии ИМА бо Тоҷикистон набояд танҳо бо таҳкими сарҳад маҳдуд шавад.
Ба қавли Уэллс, таҷаммӯъи террористони Давлати исломӣ (ДОИШ) дар сарҳад бо Афғонистон то ҳол таҳдидеро дар худ боқӣ мегузорад, аз ин рӯ, нерӯҳои низомии ИМА ба зарбаҳо ҷиҳати маҳви онҳо дар Афғонистон идома медиҳанд.
“Ин кафолати он буда метавонад, ки ДОИШ таҳдид барои Тоҷикистон ва кишварҳои Осиёи Марказӣ нахоҳад буд”, – мутмаин аст ӯ.
Элис Уэллс қайд кард, ки ИМА ба дастгирии Тоҷикистон дар ҳалли мушкили дарозмуҳлати таъмини амният дар сарҳад омода аст.
“Аз соли 2002 ҳукумати ИМА барои таҳкими ҳифзи сарҳади Тоҷикистону Афғонистон наздики 200 млн. доллар маблағ ҷудо кард”, – иброз дошт дипломат.
Тибқи маълумоти ӯ, танҳо дар 3 соли охир Департаменти давлатӣ оид ба мудофиаи ИМА барои тақвияти ҳифзи сарҳадоти Тоҷикистон 46 млн. доллар ҷудо кардааст.
– Ман аз дастаи сарҳадии Панҷ боздид кардам. Ин яке аз дидбонгоҳҳое мебошад, ки аз ҷониби ИМА бо таҷҳизоти муосири алоқа ва дигар дастгоҳҳои зарурӣ барои ҳифзи пурсамари марз таъмин шуда, ба сарҳадбонон дар пешгирии вуруди террористон ба кишвар ва қочоқи маводи мухаддир кумак мекунад, – гуфт Уэллс.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
