Дар шимоли Тоҷикистон як зан барои аз зиндон озод кардани мӯйсафеди 69-сола аз писари ӯ 120 ҳазор сомонӣ талаб карда, вақти гирифтани маблағ боздошт шудааст.
Бино ба иттилои ВКД, ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия зани 36-солаи сокини ноҳияи Б.Ғафуров бо гумони содир кардани ҷинояти қаллобӣ дастгир шуд.
Гумонбар аввалҳои моҳи январи соли 2020 бо роҳи фиреб ба боварии марди 35-солаи сокини ҳамин ноҳия даромада, бо баҳонаи тавассути шиносҳояш озод кардани падари 69-солаи ӯ, ки соли 2008 бо моддаи 104 қисми 2-и Кодекси ҷиноятии ҶТ (Одамкушӣ) гунаҳкор дониста шуда, ба муҳлати 24 сол аз озодӣ маҳрум гардидааст, 120 ҳазор сомонӣ талаб кардааст.
Ин зан ҳангоми гирифтани маблағи мазкур 13-уми январ дастгир шудааст.
Ҳамчунин дар рафти тафтишот маълум гардид, ки номбурда соли 2015 барои озод кардани падари ҷабрдида маблағи 18 ҳазор доллари амрикоӣ гирифта буд.
Нисбат ба гумонбаршаванда парвандаи ҷиноятӣ бо моддаи 247 қисми 4-и Кодекси ҷиноятии ҶТ (Қаллобӣ) оғоз карда шуда, тафтишот идома дорад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
