Прокурори генералии Тоҷикистон Юсуф Раҳмон имрӯз зимни нишасти хабарӣ изҳор дошт, ки ҷонибдори бекор кардани моратория (даст кашидан аз иҷро) ба ҳукми қатл дар кишвар аст.
Дар ҳамин ҳол, ӯ таъкид дошт, ки қаблан низ чунин изҳори назар карда буд.
“Соли 2019 танҳо бо ҷурми даст доштан дар терроризм аз ҳисоби шахсони қаблан маҳкумшуда беш аз 100 нафар ба ҷавобгарии ҷиноятӣ ҷалб шуданд. Онҳо ислоҳнашавандаанд. Мо онҳоро такроран ба ҷавобгарӣ мекашем. Ба муҳлате, ки онҳо адои ҷазо мекунанд, мо ҳадди ниҳоӣ ду-се сол илова карда метавонем. Онҳо боз ба ҷинояткорӣ даст мезананд”, – таъкид дошт прокурори генералӣ.
Ёдрас мекунем, соли 2016 Юсуф Раҳмон пешниҳод намуд, истифодаи ҳукми қатл нисбат ба шахсоне, ки ҷиноятҳои вазнин ва бераҳмона содир кардаанд, аз ҷумла, террористон, хоинони Ватан ва касоне, ки кӯшиши табаддулоти давлатӣ кардаанд, васеъ шавад.
“Ҳукми қатл бояд нисбат ба шахсоне истифода шавад, ки ҷиноятҳои махсусан вазнин ва бераҳмона содир кардаанд, аз қабили дидаву дониста куштани якчанд кас бо бераҳмии махсус, террористону хоинони Ватан ва касоне, ки кӯшиши табаддулоти давлатӣ кардаанд”, – изҳор дошта буд ӯ соли 2016.
Моҳи июни соли 2003 шумори моддаҳо дар Кодекси ҷиноятии Тоҷикистон, ки дар онҳо ҳукми қатл пешбинӣ шудааст, аз 15 то 5 адад кам шуд.
Аз моҳи июни соли 2004 дар Тоҷикистон моратория ба ҳукми қатл амал мекунад, ки аз ҷониби раисҷумҳур Эмомалӣ Раҳмон эълон шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
