Раиси шаҳри Душанбе Рустами Эмомалӣ рӯзи 29 январ бо ҷараёни корҳои бунёдӣ дар сохтмони Боғи "Истиқлолият" бо майдони маҷмааи меъмории рамзи "Истиқлолият ва Озодӣ"-и пойтахт шинос шуд.
Бино ба иттилои дафтари матбуоти шаҳрдории пойтахт зимни боздид аз мавзеи бунёди иншооти ҷашнӣ, ба Рустами Эмомалӣ иттилоъ доданд, ки то имрӯз тадбирҳои вобаста ба бунёди чоҳбонии маҷмаа ва бунёди мехсутунҳо анҷом шуда, барои бунёди маҷмааи меъморӣ омода гардидааст.
Раиси шаҳри Душанбе зимни шиносоӣ бо ҷараёни корҳои бунёдӣ дар иншооти мазкур, ба сифатнокӣ ва муҳлати иҷрои корҳо, масолеҳи сохтмонӣ ва вусъат бахшидани дигар тадбирҳои вобаста ба бунёди он, аз ҷумла иншооти бартарафшавандаи атрофи маҷмаа таваҷҷуҳ зоҳир намуда, масъулинро муваззаф намуд, ки иҷрои корҳои сохтмониро дар вақти муқарраргардида таъмин намоянд.
Раиси шаҳри Душанбе инчунин аз ҷараёни корҳои анҷомёфтаи муҷтамеи муҳташами варзишӣ, воқеъ дар кӯчаи Карамови ноҳияи Синои пойтахт боздид ба амал оварданд.
Иттилоъ дода шуд, ки маҷмааи варзишӣ аз қасри теннис барои 3000 ҷойи нишаст ва қасри намудҳои варзиши обӣ барои 2000 ҷойи нишаст бо таваққуфгоҳи зеризаминӣ иборат буда, ҳамчунин дар шафати он 8 майдончаи тенниси кушод, ки ҳар кадом дорои 1000 ҷойи нишаст мебошад, сохта шудааст.
Аснои шиносоӣ Рустами Эмомалӣ ба корҳои то имрӯз сомонёфта дар маҷмааи варзишӣ баҳои баланд дода, ба сохтмончиён ҷиҳати бо сифати баланд ва дар муҳлати муайян ба итмом расонидани корҳои боқимонда дастур доданд.
Рустами Эмомалӣ ҳамчунин дар кӯчаи Низоми Ганҷавии ноҳияи Синои пойтахт бо рафти корҳои сохтмонӣ дар варзишгоҳ барои 30 ҳазор ҷойи нишаст шинос шуд. Масоҳати ҷудогардида барои бунёди ин иншооти азими варзишӣ 9,05 гектарро дар бар гирифта, андозаи майдони футбол 105х68 метрро ташкил медиҳад.
То ин вақт аз ҷониби сохтмончиён корҳои кандани пули мошингард, кандани чоҳбун (котлован), кӯчонидани қубурҳои обу корезӣ ва фазлоб, бунёди таҳкурсии тасмашакл дар ҳама блокҳо ва инчунин деворҳои оҳану бетонии таҳхонаҳо пурра ба анҷом расонида шудаанд.
Раиси шаҳр сохтмончиёнро муваззаф сохт, ки барои дар муҳлатҳои муайян бо сифати баланданҷом додани сохтмон корро дар мавсими гармо дар ду баст ба роҳ монда, тибқи нақшаи тарҳрезишуда иншоотро соли 2021 пурра ва бо сифати баланд барои баҳрабардорӣ омода намоянд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
