Се собиқадори Ҷанги Бузурги Ватанӣ (ҶБВ) аз Тоҷикистон бо даъвати ҳукумати Русия дар ҷашнҳо бахшида ба 75-умин солгарди Ғалаба дар шаҳри Маскав иштирок мекунанд.
Тавре ба “Азия-Плюс” раиси Шӯрои собиқадорони ҷангу меҳнати ҷумҳурӣ Раҳмат Қудратов хабар дод, собиқадорон Мирзо Бегамовро аз Кӯлоб, Шариф Ғафуровро аз Хуҷанд писаронашон Музаффар ва Тоҳир, собиқадори ҷанг аз шаҳри Турсунзода Назар Ашӯровро наберааш Ҷаҳонгир дар сафар ҳамроҳӣ мекунанд.
Қобили зикр аст, ки айни замон дар Тоҷикистон 184 нафар собиқадорони Ҷанги Бузурги Ватанӣ боқӣ мондаанд.
Президенти Тоҷикистон Эмомалӣ Раҳмон низ дар гузашти низомӣ ба муносибати 75-солагии Ғалаба дар Маскав рӯзи 9 май иштирок мекунад. Тавре ба “Азия-Плюс” аз ҳукумат хабар доданд, ӯ ҳамчунин дар вохӯрии ғайрирасмии сарони кишварҳои узви ИДМ, ки рӯзи 8 май дар Маскав баргузор мешавад, ширкат меварзад.
Аз Тоҷикистон давоми солҳои 1941-1945 ҳудуди 300 ҳазор нафар ба ҷабҳаи набард рафтанд. Наздики 100 ҳазор нафари онҳо дар майдони ҷанг ҳалок шуда, 55 ҳазор кас бо ордену медалҳо сарфароз гардbданд ва 64 тоҷикистонӣ бо унвони олӣ – Қаҳрамони Иттиҳоди Шӯравӣ қадрдонӣ шуданд.
Дар гузашти низомӣ бахшида ба Рӯзи Ғалаба дар Маскав ротаи сарбозону афсарони Вазорати мудофиаи Тоҷикистон иштирок мекунад. Боз як ротаи Қувваҳои мусаллаҳи Тоҷикистон рӯзи 9 май дар гузашти низомӣ бахшида ба ин ҷашн дар шаҳри Екатеринбурги Русия ширкат меварзад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
