Бонки осиёии рушд (БОР) дар доираи лоиҳаи ҷорӣ оид ба нигоҳубини маҷмӯавии солимии модарону кӯдакон баҳри дастгирии талошҳои ҳукумати Тоҷикистон дар масъалаи пешгирӣ ва муқовимат бо коронавирус (COVID-19) дар ҳаҷми 100 ҳазор доллар грант ҷудо мекунад.
Дар чаҳорчӯби ин кумаки БОР дастрас кардани лавозимоти мавриди ниёзи аввал дар ин вазъ (ниқобу дастпӯшакҳо, респиратору термосканер) ва таҷҳизоти зарурии ташхис бо истифода аз усули фаврии харидорӣ пешбинӣ шудааст.
Вазорати тандурустӣ ва ҳифзи иҷтимоии аҳолии Тоҷикистон 4-уми марти соли равон бо дархости кумак ба БОР муроҷиат кард. То 15-уми март дар Тоҷикистон ягон ҳолати сирояти коронавирус ба қайд гирифта нашуда, 1566 нафар ба карантин гирифта шудаанд.
Бонки осиёии рушд бо ҳукумат, Созмони ҷаҳонии тандурустӣ ва дигар шарикони марбута мунтазам дар робита буда, баҳри кумак дар сурати зарурат омода аст.
Бонки осиёии рушд яке аз ташкилотҳои бузурги мададрасони Тоҷикистон ба ҳисоб рафта, ба Тоҷикистон дар маҷмӯъ ба маблағи 1,8 млрд. доллар кумак кардааст, ки зиёда аз 1,3 млрд доллари он дар шакли грант дода шудааст. Ин маблағҳо ба беҳбуди зерсохтори нақлиёт ва энергетикаи кишвар, дастгирии рушди иҷтимоӣ, тавсеъаи истеҳсолот дар бахши кишоварзӣ, таҳкими ҳамкорӣ ва савдои минтақавӣ мусоидат карданд.
Бонки осиёии рушд соли 1966 таъсис дода шуд. Саҳмдорони бонк 68 кишвар буда, 49-тои он дар минтақаи Осиё ва Уқёнуси Ором ҷойгиранд. Минтақаи Осиё ва Уқёнуси Оромро ба минтақаи шукуфо, ҳамгиро, ба ҳаёт тобовар ва устувор табдил додан ва аз байн бурдани қашшоқӣ аз ҳадафҳои БОР унвон мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
