Сафорати Тоҷикистон дар Русия бинобар паҳншавии коронавируси нав ва хатари он, аз ҳамаи ҳамватанон хоҳиш кардааст, ки ҳолати ба вуҷуд омадаро дуруст ва воқеъбинона дарк намоянд. Аз шаҳрвандони Тоҷикистон дархост шудааст, ки бо ҳисси масъулиятшиносӣ тадбирҳо ҷиҳати пешгирӣ аз паҳншавии коронавирус андешидашудаи ҳукумати кишвари иқоматро комилан риоя карда, оромиро нигоҳ доранд.
“Ҳукумати ҶТ бо мақсади ҳалли мушкилоти шаҳрвандони Тоҷикистон ҳамаи чораҳои заруриро андешида, аксарияти онҳоеро, ки хоҳиши ба Ватан баргаштан доштанд, тавассути 7 парвози чартерии ҳавопаймоҳои ватанӣ аз Москва ба шаҳрҳои Тоҷикистон баргардонид”, – хабар додааст сафорат.
Гуфта мешавад, дар сурати имконпазир гардидани парвози ҳавопаймоҳо, шаҳрвандон маълумотро танҳо аз сомонаҳои (сайтҳои) ширкатҳои ҳавопаймоӣ, сафорат ва консулгариҳои генералии Тоҷикистон дар Русия, инчунин дигар мақомоти расмии Тоҷикистон дарёфт хоҳанд кард.
“Айни замон бояд ҳар як фарди ҷомеа дуруст дарк намояд, ки ин вазъияти душвор паёмади пандемияи коронавирус буда, кишварҳо ба хотири таъмини амнияти аҳолӣ барои манъи хатсайрҳо ва бастани сарҳадҳояшон маҷбур гардиданд. Дар чунин ҳолат тасмими дуруст ва рафтори шоиста ба хотири эҳтиёт кардани сиҳатмандии худ ва аҳли хонаводаю наздикон он аст, ки аз сафар ба дигар шаҳру минтақаҳо ва кишварҳо худдорӣ карда шавад. Зеро бо сабабҳои воқеӣ, сафар кардан тавассути фурудгоҳу истгоҳҳои роҳи оҳан номумкин аст”, – таъкид кардааст сафорати Тоҷикистон дар Русия.
Дар ин робита аз ҳамватанон хоҳиш шудааст:
– ба қадри имкон ҷойи зист ва ё маҳалли кори худро бе зарурат тарк накунанд;
– бе зарурат аз метро ва дигар воситаҳои нақлиёти ҷамъиятӣ истифода набаранд ва дар маҳалҳои корӣ ва бозору фурӯшгоҳҳо ҷамъ наоянд;
– дар сурати имконпазир будан, фаъолияти меҳнатӣ ва дигар эҳтиёҷот фосилавӣ (дистанционно) анҷом дода шавад;
– ҳатман ҳамаи қоидаҳои беҳдоштии сиҳатмандиро (гигиениро) риоя намоянд!
Дар сурати ба миён омадани мушкилот ва дигар ҳолатҳои зарурӣ, инчунин барои гирифтани посух ба суолҳо, шаҳрвандон метавонанд ба таври шабонарӯзӣ ба намояндагиҳои дипломатии Тоҷикистон дар Русия бо рақамҳои телефон ва адресҳои электронии интернетии зерин тамос гиранд:
шаҳри Москва:
моб: +7 (926) 411 09 61
+7 (995) 501 87 33
+7 (985) 740-02-12
тел: +7 (495) 690-41-86
e-mail: [email protected]
Facebook: @tajembassy.ru
website: www.tajembassy.ru
шаҳри Санкт-Петербург:
тел: +7 (812) 490-47-46
шаҳри Уфа:
тел: +7 (347) 276-52-96
шаҳри Екатеринбург:
тел: +7 (343) 370-23-60
шаҳри Новосибирск:
тел: +7 (383) 349-59-70
