Корҳои таъмиру навсозии чорумин аз рӯйи иқтидор неругоҳи барқи обии Тоҷикистон – “Сарбанд” идома дорад. Дар ин бора намояндагии Бонки осиёии рушд (БОР) хабар медиҳад.
Ин корҳо аз ҳисоби кумаки бебозгашти БОР дар ҳаҷми 135 млн доллар маблағгузорӣ мешаванд.
Дар нерӯгоҳ турбинаву генератор ва дигар таҷҳизоти бештар пурсамару муосир насб шудааст.
Дар лоиҳаи таҷдиди ин неругоҳ таъмиру навсозии гидроагрегатҳои 1, 2 ва 5-ум, инчунин аз таъмири асосӣ баровардани гирдроагрегатҳои 3 ва 6-ум пешбинӣ гардида буд.
Лоиҳа аз ду марҳила иборат буда, дар назар дошта шудааст, ки амалисозии он соли равон ба итмом мерасад.
НБО Сарбанд соли 1962 дар доираи сохтмони силсиланеругоҳҳои барқи обӣ дар дарёи Вахш муваққатӣ ба истифода дода шуда, соли 1966 пурра мавриди баҳрабардорӣ қарор гирифт.
Тӯли фаъолият дар он 50 млрд кВт-соат неруи барқ истеҳсол шудааст. Иқтидори лоиҳавии неругоҳ ба 240 мВт баробар аст. Аммо бо гузашти солҳо иқтидори он тадриҷан камтар шуд ва имрӯз ҳамагӣ 160 мВт-ро ташкил медиҳад.
Аз рӯйи иқтидор айни замон НБО Сарбанд пас аз неругоҳҳои Норак (2700 мВт), Сангтӯда (670 мВт) ва Бойғозӣ (600 мВт) дар Тоҷикистон зинаи чорумро ишғол мекунад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
