Бонки миллии Тоҷикистон овозаҳои гирифтори коронавирус шудани кормандонашро рад кардааст.
“Маълумот дар хусуси бемории кормандони Бонки миллӣ асоси воқеӣ надошта, қисме аз кормандон дар рухсатии меҳнатии нақшавӣ қарор доранд ва кормандони боқимонда ба иҷрои вазифаҳои худ идома дода истодаанд”, – қайд шудааст дар хабари сомонаи БМТ.
Дар идомаи он гуфта мешавад, “баъзе аз нафарони ҳангоматалаб аз пайдоиши ин бемории сироятӣ дар Тоҷикистон истифода карда, кӯшиш намуда истодаанд, ки мардумро ба таҳлука андозанд”.
Ҳамчунин зикр шудааст, ки “рӯзҳои охир дар шабакаҳои иҷтимоӣ ва сомонаҳои ҳангомаҷӯ хабарҳои бардурӯғ дар хусуси гирифтори бемории илтиҳоби шуш (пневмония) ва бистарӣ гардидани муовини якум ва муовини раиси Бонки миллӣ Ҷамолиддин Нуралиев ва Ҳамидулло Машрабзода, инчунин кормандони БМТ маълумоти таҳрифшуда ва дур аз воқеият ба нашр расиданд”.
“Бонки миллии Тоҷикистон расман изҳор менамояд, ки ин хабарҳо асоси воқеӣ надошта, Ҷамолиддин Нуралиев ва Ҳамидулло Машрабзода сиҳату саломат ва дар дафтари корӣ аз пайи иҷрои вазифаҳои худ мебошанд”, – таъкид шудааст дар хабар.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
