Зимни машварат бо раҳбарияти Доғистон ва намояндагони ҷомеа президенти Русия Владимир Путин изҳор дошт, ки умедвор аст мусалмонони Русия бо тавсияи ходимони дин Иди Рамазонро дар хонаҳояшон ҷашн мегиранд. Дар ин бора Интерфакс хабар медиҳад.
Моҳи Рамазон бо Ид алфитр ё Иди Рамазон ба анҷом мерасад, ки ҷашни бузургу муҳими мусалмонон ба шумор рафта, муддати се рӯз ҷашн гирифта мешавад. Дар Русия он имсол ба рӯзи 24 май рост меояд.
“Ман огаҳам, ки дар Доғистон ба ин ид чӣ гуна муносибат доранду расму оинҳоро гиромӣ медоранд. Инро ҳам медонам, ки ходимони дин даъват доранд, ки дар замони ҳозира ин ид дар хонаҳо ҷашн гирифта шавад, аз ибодатҳои дастаҷамъона, анъанаҳои як ҷо ҷамъ шудан бо дӯстон ва маъракаҳои сериздиҳом худдорӣ шавад. Умедворам, ки тасвияҳои ходмиони маъруфи дин сарфи назар намешаванд", – гуфтааст Путин.
Аз рӯйи шумори сироятёфтагон Доғистон дар ҷойи панҷум дар Русия қарор дорад. Дар минтақа 3,5 ҳазор нафар беморон ва 29 каси фавтида сабт шудааст.
Дар ҳамин ҳол, вазири тандурустии Доғистон Ҷамолуддин Ҳоҷииброҳимов қаблан хабар додаа буд, ки аз бемории COVID-19 дар минтақа 40 табиб фавтидаанд.
Ҳамагӣ дар Русия 291 ҳазор сироятёфтагон ба қайд гирифта шуда, 2 ҳазору 700 нафар фавтиданд. Шабонарӯзи охир 8,9 ҳазор ҳолати нави сироят ба қайд гирифта шуд.
Дар ҳамин ҳол, дар Тоҷикистон низ намози Иди Рамазон баргузор намешавад. Тавре аз Шӯрои уламои кишвар хабар доданд, намоз тариқи онлайн низ доир намегардад, зеро он ба шариати ҳанафӣ мухолиф аст. Рӯзи саҳеҳи Иди Рамазон дар Тоҷикистон 20 май эълон мешавад. Яқинан он рӯзи 24 май хоҳад буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
