Вазорати рушди иқтисод ва савдои Тоҷикистон дар бораи ҷудо кардани маблағҳо барои сохтмони нерӯгоҳи барқи обии “Себзор” дар ВМКБ созишномаи навбатии грантӣ ба имзо расонид.
Бино ба иттилои дафтари матбуоти Вазорат, рӯзи 22 июл вазири рушди иқтисод ва савдо Завқӣ Завқизода Созишномаи сеҷонибаи грантиро бо Бонки Олмонии Рушд барои сохтмони НБО “Себзор” ба маблағи 18,6 млн. евро ба имзо расонид, ки ин маблағҳои грантии Иттиҳоди Аврупо мебошад.
Гуфта мешавад, дар доираи ин маросим Шартнома оид ба пешниҳоди маблағи грантӣ дар ҳаҷми 1 млн. евро барои кумакҳои ниёзи тиббӣ ҷиҳати бақайдгирии беморӣ ва омӯзонидани кормандони соҳаи тиб барои бартараф намудани паҳншавии пандемияи коронавируси COVID – 19 низ ба имзо расонида шуд.
Хотиррасон мешавад, ки 2 августи соли 2019 байни ҳукумати Тоҷикистон ва ҳукумати Олмон Созишнома оид ба ҳамкориҳои молиявӣ ба имзо расонида шуда, дар доираи созишномаи мазкур ҷониби Германия 17 млн. евро грант барои сохтмони лоиҳаи НБО “Себзор” пешбинӣ намудааст.
“Инчунин 2 декабри соли 2019 байни ҳукумати Тоҷикистон ва ҳукумати Конфедератсияи Швейтсария барои маблағгузориии бунёди хати интиқоли барқи 110 кВ “Себзор-Хоруғ”, дастгоҳи тақсимкунандаи кушодаи 110 кВ, чорабиниҳо доир ба паст намудани оқибатҳои тағйирёбии иқлим Созишнома ба маблағи грантии 9,55 млн. доллар ба имзо расид”, – омадааст дар хабар.
Ба иттилои манбаъ, ҳамзамон аз ҷониби Бонки ҷаҳонӣ 1,9 млн. доллар барои омодасозии асосноккунии техникию иқтисодии хати интиқоли барқи 110 кВ “Хоруғ-Ишкошим” ва аз ҷониби Агентии ИМА оид ба рушди байналмилалӣ (USAID) 3 млн. доллар барои гузаронидани таҳқиқотҳои зарурӣ ва баланд бардоштани иқтидори ҶСК “Помир энерҷӣ” маблағҳои грантӣ пешбинӣ гардидааст.
Қобили зикр аст, ки НБО “Себзор” дар дарёи Шоҳдараи ВМКБ сохта мешавад. Ба корҳои сохтмони он тобистони соли 2015 президенти мамлакат Эмомалӣ Раҳмон ҳусни оғоз бахшида буд.
Айни замон корҳо дар нерӯгоҳ бо дастгирии ҳукумат аз ҷониби ширкати “Помир Энержӣ” роҳандозӣ шудааст.
Дар паёми ахири худ ба парлумони кишвар Эмомалӣ Раҳмон изҳор дошта буд, ки нерӯгоҳи “Себзор” соли 2022 ба истифода дода мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
