Тӯли 6 моҳи соли равон дар корхонаҳои Тоҷикистон зиёда аз 8 млн ниқоби тиббӣ истеҳсол карда шуд.
Вазири саноат ва технологияҳои нави Тоҷикистон Заробиддин Файзуллозода зимни нишасти хабарии рӯзи 28 июл изҳор дошт, ки аз ин шумор зиёда аз 2,7 млн ниқоб ба хориҷи кишвар содирот шуд.
“Ҷиҳати пешгирии паҳншавии бемории сироятӣ, аз ҷониби як қатор корхонаҳои саноати сабук истеҳсоли номгӯи нави маҳсулот, аз ҷумла дока, ниқоб ва халатҳои махсуси муҳофизатии тиббӣ ба роҳ монда шуд, – гуфт вазир. – Аз ин миқдор беш аз 2 млн 700 ҳазор дона ниқоб бо нархи 1 евро ба Италия ва Сербия фурӯхта шуд”.
Дар самти истеҳсоли халатҳои муҳофизатии махсус 17 корхонаи саноати сабук машғул буда, дар ин давра 55 ҳазор дона ин навъи либос истеҳсол кардаанд.
“Дар давраи пандемия корхонаҳои Тоҷикистон истеҳсоли воситаҳои антисептикӣ ва шустушӯро зиёд карданд. Дар ширкатҳои «Сатурн-1», «Баҳор косметик групп», «Покофар», «Давои Сино», «Фарм Суғд», «Тоҷикхимпром» ва дигар корхонаҳо зиёда аз 200 ҳазор воситаҳои шустан, 190 литр воситаҳои антисептикӣ, 125 тонна собуни мушкин, 255 тонна хлор, 260 тонна гипохлориди натрий истеҳсол шуд”, – қайд кард Файзуллозода.
Тибқи маълумоти Вазорат, давоми моҳҳои январ-июни соли равон дар корхонаҳои саноати сабуки кишвар, аз ҷумла корхонаҳои коркард ба маблағи беш аз 781,4 млн сомонӣ маҳсулот истеҳсол шудааст, ки нисбат ба ҳамин давраи соли гузашта 32,7 млн сомонӣ зиёдтар буда, суръати афзоиш 104,4%-ро ташкил додааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
