Ду рӯз пеш аз оғози соли нави хониш, ки дар муассисаҳои таълимии Тоҷикистон аз 17 август оғоз мегардад, ҳамаи нақлиёти мусофирбар дар пойтахт ба кор дароварда мешавад. Айни замон ҳамагӣ 35%-и нақлиёти ҷамъиятӣ кор мекунад.
“То оғози соли хониш нақлиёти ҷамъиятӣ дар Душанбе 100% ба кор сафарбар мешавад, яъне 559 автобусу троллейбус, инчунин 1 654 микроавтобус (маршрутка) ва 2629 такси ба хатсайрҳо мебароянд”, – хабар дод ба “Азия-Плюс” директори КВД «Душанбенақлиётхадамотрасон» Ҷумъахон Давлат.
Айни замон дар пойтахт ҳамагӣ аз 35%-и нақлиёти мусофирбар истифода мешавад: 144 автобусу троллейбус, 620 микроавтобус ва 890 такси.
Машғулиятҳои соли нави хониш дар муассисаҳои таълимии Тоҷикистон аз 17 август оғоз мегарданд.
Вазири маориф ва илми Тоҷикистон Муҳаммадюсуф Имомзода чанде пеш зимни нишасти матбуотӣ изҳор дошт, ки қарори мазкур дар мувофиқа бо Сиоди ҷумҳуриявии пешгирии паҳншавии коронавирус қабул шудааст.
“Бар асари пандемияи коронавирус ҷадвали таҳсил каме қафо монд. Метавон гуфт, ки ин ду ҳафта як давраи мутобиқшавӣ хоҳад буд. Дар ду ҳафта мавзӯъҳои охири соли гузашта мавқуфмонда омӯхтаву такрор шуда, сипас соли нави хониш оғоз мегардад”, – гуфт вазир.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
