Дар рӯзи аввали оғози даъват ба хизмати ҳарбӣ дар сафи Қувваҳои Мусаллаҳи Тоҷикистон, ки 1 октябр оғоз гардида, то 30 ноябр идома меёбад, чанде аз шаҳру навоҳӣ аз иҷрои нақша хабар доданд, аз ҷумла ВМКБ, шаҳрҳои Исфара ва Норак, ноҳияҳои Шаҳристон, Рашт, Лахш, Сангвор, Тоҷикобод, Нуробод. Давоми 10 рӯз аз оғози ин маърака иҷрои нақшаи даъват дар сарорсари кишвар 75% иҷро шуд.
Тавре ба “Азия-Плюс” сардори маркази матбуоти Вазорати мудофиаи ҷумҳурӣ полковник Фаридун Маҳмадализода хабар дод, дар рӯзҳои аввали даъват Вилояти Мухтори Кӯҳистони Бадахшон нақшаро барзиёд – 106% иҷро кард.
Ба гуфтаи ӯ, то ин дам иҷрои нақшаи даъвати тирамоҳӣ ба хизмати ҳарбӣ дар вилояти Суғд 60%, Халон – 70%, Ноҳияҳои тобеи марказ – 85% ва шаҳри Душанбе – 87% таъмин шудааст.
Маъракаи даъвати тирамоҳӣ ба хизмати ҳатмии ҳарбӣ дар Қувваҳои мусаллаҳи Тоҷикистон ду моҳ – октябр ва ноябр ҷараён мегирад. Ҳамасола шаҳрвандони синни аз 18 то 27-сола, ки ба таъхири муҳлати хизмат ё озод будан аз хизмати ҳарбӣ ҳуқуқ надоранд, ба хизмат даъват карда мешаванд.
Қобили зикр аст, ки дар ҳамаи минтақаҳое, ки нақшаи даъват пеш аз муҳлат иҷро шуд, бештар ҷавонон ихтиёрӣ ба хизмат дар сафи Қувваҳои Мусаллаҳ кишвар азм мекунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
