Бино ба иттилои дарёфтии “Азия-Плюс” дар баробари раиси пешини шаҳри Кӯлоб Баҳром Иноятзода, ҳамчунин нисбат ба чаҳор нафари дигар низ парвандаи ҷиноии шарикӣ боз шудааст. Худи Иноятзода бо 6 моддаи Кодекси ҷиноятии Тоҷикистон муттаҳам мешавад.
Сафар Холмадзода, судяи додгоҳи вилоятии Хатлон додроси ин парванда аст, ки 6-уми октябр баррасии парвандаро оғоз кардааст. Парвандаи раиси пешини Кӯлоб дар додгоҳи минтақавии вилоятӣ дар шаҳри Кӯлоб идома дорад, ки ба гуфтаи Табарзода Изаттуло Сафар, муовини раиси Додгоҳи влояти Хатлон дар ин парванда шоҳидон бештар аз 50 нафаранд, ки эҳтимол парванда зиёдтар аз як моҳ тӯл бикашад.
Гумонбарони дигар дар ин парванда Хурсандалӣ Хурамов ронандаи Иноятзода бо ду модда: 247 қисми 2, (қаллобӣ), 36 (шарикӣ), 319 қисми 4; Фирӯз Қурбонов, сармутахассиси шуъбаи шаҳрсозии ҳукуматаи шаҳри Кӯлоб бо моддаҳои 36 қисми 2, 319 қисми 4; Ашӯрмадов Хуршед Ҳасанович, мудири қисми хоҷагии ҳукумати ин шаҳр бо моддаҳои 245 қисми 3, банди «а», 245 қисми 3, 323, Муҳаммадӣ Шамсиддинов,масъули ҳамлу нақли сангҳои ороишӣ барои таъмири бинои Ҳукумати шаҳри Кӯлоб бо моддаи 259 қисми 2 мебошанд.
Худи Иноятзода бо моддаҳои 314 қисми 2, (сӯистифода аз ваколатҳои мансабӣ), 319 қисми 4 (гирифтани пора дар ҳаҷми бузург), 245 қисми 2 (аз они худ кардани молу мулки ба зимааш гузошташуда), 247 (қаллобӣ), 338 нишонаи 1, қисми 2 (ғайриқонунӣ додани қитъаи замин), 262 (қонунгардониии даромадҳои бо роҳи ҷиноят ба даст омада) айбдор мешавад.
Мо талош кардем назари вакилони дифои Иноятзодаро вобаста ба ин парванда бигирем, вале талошҳои мо натиҷа надод. Яке аз вакилони дифоъи Иноятзода Басиров ба занги телефонии мо посух дод ва вақте матлаби моро фаҳмид, гуфт баъди як соат назарашро бо мо шарик месозад, вале баъди як соату соатҳои дигар телефони Басиров дастнорас буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
