Моҳи сентябри соли ҷорӣ, бо пуштибонии Ҳукумати Олмон ва ширкати олмонии “TajikAid” (https://tajikaid.de), дар Маркази миллии тиббии ҶТ (Беморхонаи Қарияи Боло) Дармонгоҳи ортопедияи ҷоғу рӯй таъсис дода шуд.
Ба ғайр аз гузаронидани ҷарроҳиҳои ҷоғу рӯӣ,ташхису табобати бемориҳои гӯшу-ҳалқу-бинӣ ва гуфтордармонӣ (логопедия), акнун имкони табобати ортопедӣ-стоматологии даҳон ва ҷоғ фароҳам шуд (ортопедияи ҷоғу рӯй). Баъди омӯзиши тӯлонии мутахассисон, ки аз ҷониби др. Геннадий Лонда аз Беморхонаи шаҳри Виттмунд, Олмон гузаронида шуд, дар Донишгоҳи давлатии тиббии ҶТ ба номи А. и. Сино акнун кафедраи стоматологияи кӯдакона ва ортодонтия амал менамояд. Илова бар ин, ҳамкории омӯзишӣ байни кафедра ва шаҳри Самараи Русия дар нақша гирифта шудааст.
Аз соли 2013 сар карда, Сафорати Олмон дар Душанбе,барои гузаронидани ҷарроҳии кӯдакони дорои бемории лаб ва коми шикофтаро аз ҳисоби маблағҳои ҷамъовардааш дар “Ярмаркаи Анъанавии Солинавии Олмонӣ” пуштибонӣ мекунад. Фоидаи ҷамъшуда аз “Ярмаркаи солинавӣ” пурра ба хонаводаҳое сарф мешавад, ки имкони пардохти чунин ҷарроҳиро барои кӯдаконашон надоранд. Кӯдаке, ки дар феҳрасти Сафорати Олмон қарор дорад, то замоне, ки вазъи саломатии ӯ пурра беҳтар мешавад, пуштибонияш давом мекунад.
Кӯдакони навзоде, ки бемории лаб ва коми шикофта (нуқси модарзоди инсон, ба якдигар начаспидани асосан лабу даҳони боло, баъзан бинӣ ва ҳатто ком) доранд, дар вақти нафасгирӣ ва истеъмоли ғизо ба душвориҳои зиёд дучор мешаванд. Ба кӯдакони хурдтарин ҷузъиёти сунъие – протез гузошта мешавад, ки қисми шикофи даҳону биниро маҳкам менамояд. Он барои беҳтар нафас кашидан, истеъмоли ғизоро осон намудан ва ба рушди мунтазами гуфтори кӯдакон мусоидат мекунад.
Ҳамасола як гурӯҳи пизишкони олмонӣ аз ташкилоти ғайридавлатии “TajikAid“ барои гузаронидани ҷарроҳиҳои мураккаб ва омӯзиши пизишкони маҳаллӣ ба Тоҷикистон меоянд.
То имрӯз зиёда аз 60 нафар кӯдак бо пуштибонии ин ташкилот ва Сафорати Олмон дар Душанбе ҷарроҳӣ карда шудаанд. Дар айни замон, боз 20 нафар кӯдак ба ҷарроҳии навбатӣ омода шуда истодаанд.
Шумо низ мехоҳед ба кӯдакон ёрии худро расонед? Пас бо мо тамос гиред:
Сафорати Олмон дар Душанбе – [email protected]
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
