Бонки миллии Тоҷикистон ҷиҳати анҷоми фаъолияти суғуртавӣ ба ҶДММ “ДС суғурта” иҷозатнома дод.
Бино ба иттилои шуъбаи матбуоти БМТ, мувофиқи қарори Раёсати Бонки миллӣ, ба ширкат барои фаъолияти суғуртавӣ аз рӯи намудҳои суғуртаи ҳатмӣ ва ихтиёрӣ ба муҳлати 5 сол иҷозатнома дода шуд.
Гуфта мешавад, зимни супоридани иҷозатнома рӯзи 15 март дар БМТ раиси Бонки миллӣ Ҳоким Холиқзода ба директори ҶДММ “ДС суғурта” Ашӯров Баҳром барои рушди бозори суғурта, тақвият бахшидани доираи маҳсулоти муосири суғуртавӣ ва ба ин васила мусоидат дар таъмини рақобати солим дар бозори суғуртаи кишвар изҳори боварӣ намуд.
Зикр мегардад, ки ҳамзамон, Идораи назорати суғуртавӣ вазифадор карда шуд, ки дар Феҳристи ягонаи давлатии иштирокчиёни касбии бозори суғурта сабти дахлдорро ворид намояд.
Тибқи маълумоти Бонки миллӣ, дар бозори суғуртаи Тоҷикистон феълан ҳамагӣ 19 ширкати суғурта фаъолият доранд, ки 2-тоаш давлатӣ ва 17-тоаш ғайридавлатӣ мебошанд.
Бо қарори ҳукумат ширкатҳои суғурта (ва бозсуғурта)-и Тоҷикистон уҳдадор шуданд, ки то 1 апрели соли равон ҳаҷми сармояи оинномавии худро зиёд кунанд.
Мувофиқи меъёрҳои нав сармояи оинномавии ширкатҳои суғурта вобаста ба шакли моликият ва навъи суғурта бояд аз 2 млн то 50 млн сомонӣ (ҳозир – аз 500 ҳазор то 40 млн сомонӣ)-ро ташкил диҳад.
Роҳандозии чунин тадбирҳоро дар Бонки миллӣ ба “Азия-Плюс” чунин шарҳ доданд, ки “ҳиссаи суғурта дар иқтисод ҳамагӣ 0,74% нисбат ба ММД-ро ташкил медиҳад, ки яке аз нишондиҳандаҳои паст дар ҷаҳон аст ва он мустақиман ба талаботи нокофӣ ба сармояи оинномавӣ вобаста аст”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
