Носирхон Сафарзода, додрас ё судяи Додгоҳи иқтисодии вилояти Хатлон, ки бо ҷурми гирифтани пора оғози моҳи март боздошт шуда буд, 19-уми март бо судури як фармони раисҷумҳури Тоҷикистон Эмомалӣ Раҳмон аз мақом барканор шуд.
Эмомалӣ Раҳмон дар фармони худ Носирхон Сафарзодаро бинобар содир намудани кирдоре, ки шаъну эътибори судяро паст мезанад, аз вазифаи судяи суди иқтисодии вилояти Хатлон барканор кардааст.
Хабари боздошт шудани Носирхон Сафарзодаро “Азия-Плюс” рӯзи 18-уми март бо такя ба як манбаи муътамад нашр карда буд. Он замон манбаъ дар сохторҳои қудратӣ, гуфта буд, ки ӯ рӯзи 9-уми март, бо гумони гирифтани пора боздошт шуд ва дар ҳабси пешакӣ қарор дорад. Манбаъ гуфта буд, ки гӯё ин додрас ба гирифтани 5 ҳазор сомонӣ ришва муттаҳам мешавад. Вале дар фармони раисҷумҳур танҳо гуфта шудааст, ки "бинобар содир намудани кирдоре, ки шаъну эътибори судяро паст мезанад".
Судяи Додгоҳи иқтисодии вилояти Хатлон дар ҳоле аз мақом барканор шуд, ки рӯзи 18-уми март дар як тамоси телефонӣ ба “Азия-Плюс” аз Додгоҳи иқтисодии вилояти Хатлон аз боздошти додраси ин ниҳод бо номи Носирхон Сафарзода изҳори бехабарӣ карда буданд.
Рӯзи 16-уми март аз Додгоҳи олии иқтисодии Тоҷикистон ба "Азия-Плюс" гуфта буданд, ки дар ҳақиқат мо дар Додгоҳи иқтисодии вилояти Хатлон додрасе бо номи Носирхон Сафарзода дорем, ки ҳоло ҳам кор карда истодааст.
Аммо субҳи 18-уми март аз Раёсати оҷонсии зидди фасод дар вилояти Хатлон хабари боздошти Носирхон Сафарзодаро тасидиқ карданд ва гуфтанд, ки алайҳи ӯ бо моддаи 319-и КҶ ҶТ парвандаи ҷиноӣ боз шудааст. Аммо ин ниҳод ҷузъиёти бештаре дар мавриди қазияи боздошти ин додарс надод.
Назари худи Носирхон Сафарзода ва наздиконаш дар мавриди бо гумори порагирӣ боздошт ва барканор шуданаш маълум нест. Гуфта мешавад ӯ бештар аз 10 сол дар Додгоҳи шаҳри Панҷакент кор карда, аз соли 2017 то замони боздошт додраси Додгоҳи иқтисодии вилояти Хатлон буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
