Зимни мулоқоти раиси Кумитаи давлатии сармоягузорӣ ва идораи амволи давлатии ҶТ Саъдӣ Қодирзода бо директори намояндагии Агентии ИМА оид ба рушди байналмилалӣ (USAID) дар Тоҷикистон Кит Симмонс масоили беҳбуди муҳити сармоягузорӣ дар ҷумҳурӣ ва ҷалби сармояи амрикоӣ ба иқтисоди кишвар баррасӣ шуданд.
“Бо назардошти ноустувории иқтисоди ҷаҳонӣ ва коҳиши воридоти сармоя, ҷонибҳо ҷиҳати беҳтар намудани фазои сармоягузорӣ ва ҷалби бештари сармояи мустақими хориҷӣ роҳандозии чораҳои мушаххасро ба мақсад мувофиқ шумориданд”, – омадааст дар хабари Кумита дар ин робита.
Қаблан моҳи феврали соли равон муовини аввали сарвазири Тоҷикистон Давлаталӣ Саид зимни видеоконфронс бо намояндагони доираҳои тиҷорати ИМА изҳор дошт, ки ҳукумат омода аст ҷиҳати ҷалби бештари сармояи мустақим ва фароҳам овардани шароити мусоид барои ширкатҳои амрикоӣ чораҳои таъхирнопазир андешад.
Ба тоҷирони амрикоӣ, аз ҷумла сармоягузорӣ ба истихроҷи канданиҳои фоиданок, инчунин роҳандозии ҳамкорӣ дар бахши кишоварзӣ, коркарди маҳсулоти кишоварзӣ, чунончи пахта пешниҳод шуд.
Зикр шуд, ки дар назар аст, ояндаи наздик силсилавохӯриҳои маҷозӣ аз рӯи соҳаҳо байни бахши хусусии ду кишвар ташкил карда шавад.
Дар ҳамин ҳол, Вазорати корҳои хориҷии ИМА сармоягузориро ба иқтисоди Тоҷикистон алҳол тавсия намедиҳад.
Департаменти давлатӣ ҳамасола имконоти сармоягузории кишварҳоро омӯхта, дар ин бора гузориш таҳия мекунад, ки ба мисли як дастур аз ҷониби тоҷирони амрикоӣ қабул мешавад.
Муаллифони гузориши ахири Департаменти давлатӣ оид ба муҳити сармоягузорӣ дар Тоҷикистон, ки тирамоҳи соли гузашта ба нашр расида буд, ҷумҳурии моро “ҷойи мушкил барои пешбурди тиҷорат бо хавфҳои зиёд барои сармоягузори хориҷӣ” номида буданд.
Монеъаҳои расмиётчигӣ (бюрократӣ) ва молиявӣ, коррупсияи густарда, фаъолияти начандон назарраси бахши бонкӣ, низоми ношаффофи андоз ва санҷишҳои бешумор аз ҷумлаи монеъаҳои асосӣ пеши роҳи тиҷорат дар Тоҷикистон унвон шуданд.
Коршиносони Департаменти давлатӣ таъкид доштанд, ки 75% аз ҳаҷми умумии сармоягузориҳои мустақими аз ҷониби Тоҷикистон ҷалбшуда дар соли 2019 “қарзҳои ношаффоф” мебошанд, ки ба ташаббуси “Як камарбанд, як роҳ”-и Чин марбутанд.
Тибқи маълумоти Кумитаи сармоягузории Тоҷикистон, давоми солҳои 2007-2019 дар ҳаҷми ҳудуди 9,9 млрд доллар сармоягузориҳи хориҷӣ ҷалб шуда, ҳиссаи сармоягузории ИМА дар ҳаҷми умумӣ ҳамагӣ 7% (695 млн доллар), Чин – ҳудуди 30% (2,9 млрд доллар) ва Русия – зиёда аз 16% (зиёда аз 1,6 млрд доллар)-ро ташкил медиҳад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
