Дар натиҷаи боришоти пуршиддати чанде қабл дар баъзе ноҳияҳои кишвар, хавфи болоравии сатҳи об дар дарёҳои Тоҷикистон вуҷуд дорад.
Тавре Кумитаи ҳолатҳои фавқулода ҷумҳурӣ хабар медиҳад, дар натиҷа дар ноҳияҳои кӯҳӣ ва доманакӯҳии Ноҳияҳои тобеи ҷумҳурӣ ва ноҳияҳои доманакӯҳии вилояти Хатлон, дар роҳҳои манотиқи кӯҳистони ҷумурӣ фаромадани селу сангреза пешгӯйӣ мешавад.
“Дар болооби рӯдхонаҳои кӯҳӣ ва дар маҷроҳои хурди об сатҳи об босуръат баланд шуда метавонад. Аз оби борону маҷрои дарё зери об мондани пастхамиҳо, заминҳои кишт, шусташавии қитъаҳои роҳ аз эҳтимол дур нест. Гузаштан аз пулҳои баландиашон паст низ хатарнок буда метавонад”, – омадааст дар хабар.
Кумита ба шаҳрвандону меҳмонони кишвар тавсия медиҳад, ки қоидаҳои асосии бехатарии шахсиро риоя намуда, аз ҳузур доштан назди обанборҳову ба моҳидорӣ машғул шудан, чаронидани чорво, ба кӯҳҳо ба сайру саёҳат рафтан, шикору ҷамъоварии ҳезум ва растаниҳои кӯҳӣ даст кашанд. Ба нигоҳубини кӯдакон таваҷҷуҳи хосса зоҳир намуда, онҳоро бе назорат нагузоранд.
Кумита аз аҳолӣ дархост мекунад, ки ҳамаи ҷӯйбору наҳр, қубурҳои обпарто ва селроҳаҳои назди хонаҳояшонро тоза кунанд.
Инчунин Кумита аз шаҳрвандон боисророна дархост мекунад, ки ҳамеша ба ахбори КҲФ, ВКД ва Вазорати нақлиёт дар мавриди вазъи роҳҳо ва имрӯзу фардои ҳаво диққат диҳанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
