Шоми 25 май парвози ҳавопаймои ширкати “Северный ветер” бо хатсайри Душанбе – Санкт-Петербург боздошта шуд.
Зиёда аз 200 мусофир дар фурудгоҳи Душанбе боқӣ монда, ҳеҷ касе ба онҳо сабаби боздошта шудани парвозро шарҳ надодааст.
Ба “Азия-Плюс” ҳоло муяссар нашуд, ки аз ширкати ҳавопаймоӣ ва сохторҳои марбута дар ин хусус шарҳ бигирад.
Ёдрас мекунем, ки Агентии авиатсияи граждании ҷумҳурӣ аз 11 май иҷрои парвозҳои ширкатҳои Северный ветер» ва «Сибирь»-ро боздошта, сабаби инро боло бурдани нархи билетҳо унвон кард.
Мусофироне, ки хатсайри ин ширкатҳо билет ххрида буданд, якчанд рӯз дар фурудгоҳҳои Душанбе ва Хуҷанд зиндагӣ карданд.
Баъди як ҳафта Агентӣ ба таври истисно ба ширкатҳо иҷоза дод, ки парвозҳоро аз Душанбе ва Хуҷанд анҷом дода, мусофирони билетхаридаро ба макони таъиноташон бирасонанд.
Он замон дар Агентӣ изҳор доштанд, ки парвозҳо танҳо дар сурате барқарор мешаванд, ки ширкатҳо арзиши билетҳоро мувофиқи қарордоди қаблан ҳосилшуда муқаррар кунанд.
Баъдан се ширкати Русия – «Уральские авиалинии», «Ямал» ва «Сибирь» ба поин бурдани нархи билетҳо розӣ шуданд.
Нархи ниҳоии билет ба парвози чартерӣ на зиёдтар аз 500 доллар муқаррар шудааст, хабар дод ба “Азия-Плюс” роҳбари Агентии авиатсияи граждании Тоҷикистон Икром Субҳонзода.
“Агентии авиатсияи гражданӣ доимо ҷонибдори он аст, ки тарифҳо поин бурда шуда, нархҳо муносиб ва қобили қабул бошанд. Норозигии мо ба парвозҳои чартерӣ ба он асос меёбад, ки нарх ба хатсайрҳои онҳо хеле баланд буд, – гуфт Субҳонзода. – Агар тарифҳо то сатҳи ниҳоии 500 доллар кам карда нашаванд, дархостҳои минбаъдаи иҷрои парвозҳои чартерӣ аз ҷониби ин ширкатҳои Русия бозбинӣ хоҳанд шуд”.
Ӯ аз мусофирон даъват кард, ки дар ҳолати пешниҳоди билет бо нархи аз 500 доллар зиёд ба хатсайрҳои ширкатҳои дар боло зикршуда дарҳол ба Агентии авиатсияи гражданӣ муроҷиат кунанд ё ба телефони боварии 236-53-34 занг зананд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
